Një banesë dykatëshe është përfshirë nga flakët orët e para të mëngjesit të sotëm në qytetin e Shkodrës. Si pasojë janë përfshirë nga zjarri edhe tri banesa të tjera ngjitur me të dhe një tjetër e pabanuar.
Sakaq pronarja e banesës dykatëshe, shprehet se shkak i zjarrit nuk ka qenë shpërthimi i bombolës dhe akuzon komshiun e saj, duke u shprehur se “Zjarri nuk ka ardhur si pasojë e bombolës, e kemi prej një skizofreni i cili punon gjithë natën duke salduar’.
“Kemi një komshi këtu, do ketë plasur ndonjë oksigjen. Andej e ka bërë ndonjë masë korrenti. Nuk ka bërë asnjë zhurmë. Nuk ka plasur bombola, absolutisht jo. Ky (komshiu) na ka djegur shtëpinë. Çdo gjë është djegur. S’kemi ku të shkojmë. Kur ka rënë zjarri ka qenë burri në banesë. Kjo nuk është prej bombolës. E kemi prej një skizofreni që punon gjithë natën duke salduar. Është djegur çdo gjë, me lavatriçe, divane, rroba, çdo gjë”, u shpreh Kola.
