Familja e aktores së njohur Chanel, Maya Banks, është në ankth pasi 36-vjeçarja ka humbur në mënyrë të mistershme në Los Angeles, dhe tani kanë kaluar dy javë që nga zhdukja e saj. Pavarësisht përpjekjeve të policisë, burri i saj ka refuzuar të bashkëpunojë në hetim.
Aktorja, e njohur për rolin e Sawyer Bennett në serialin ‘Gossip Girl’, ishte duke qëndruar në apartamentin e saj në Playa Vista kur humbi gjurmët. Nëna e saj, Judy Singh, dhe kushërira Danielle-Tori Singh, udhëtuan në Kaliforni për të ndihmuar me kërkimin, por u përballën me një skenë shqetësuese: të gjitha sendet personale të Chanel ishin në banesë, përfshirë qenin dhe makinën e saj, por celulari dhe laptopi mungonin.
Sipas familjarëve, ata janë të shqetësuar për faktin se bashkëshorti i Chanel, i martuar me të prej vitit të kaluar, nuk pranon të japë ndihmë apo informacione për hetimin. “Ai refuzon të ndihmojë policinë apo familjen për ta gjetur Chanel,” deklaroi kushërira e saj. Për më tepër, Danielle-Tori raportoi se burri i saj ka hequr posterat e kërkimit të Chanel që familjarët kanë vendosur nëpër zonë.
Tensionet u shtuan më tej pasi familja vuri re shenja lëndimesh në fytyrën dhe trupin e bashkëshortit të saj, të cilat u shfaqën më 10 nëntor. Megjithatë, policia ka njoftuar se nuk ka prova të mjaftueshme për të ngritur akuza ndaj tij apo për të ndërmarrë veprime ligjore.
Për të vazhduar kërkimet, familja ka krijuar një faqe në GoFundMe për të mbledhur fonde që do të mbulojnë shpenzimet e një hetuesi privat dhe qëndrimin e tyre në Los Angeles. “Të duam shumë, Chanel. Vetëm duam të dimë që je e sigurt,” tha Danielle, duke i drejtuar një mesazh emocional Chanel.
