Fenomeni “Narco” Taxi më në fund ka vënë në lëvizje autoritetet. Drejtoria Vendore e Policisë Tiranë, sqaron se çështja ka kaluar në Prokurorinë e Tiranës dhe se paralelisht Policia ka zhvilluar dy operacione, ku janë arrestuar 5 taksistë të përfshirë në shitjen e drogës.
“Në përgjigje të shkresës suaj të datës 02.05.2024, përmes së cilës kërkoni informacion për masat e marra nga Policia e Shtetit, në lidhje me një dokumentar të publikuar nga ZËRI Media më datë 26.02.2024, ju bëjnë me dije se nga shërbimet e Seksionit për Hetimn e Narkotikëve, pranë drejtorisë Vendore të Policisë Tiranë me marrjen dijeni të rastit, janë kryer veprimet e para hetimore nën drejtimin e prokurorit të gatshëm të Prokurorisë pranë Gjykatës së Shkallës së Parë të Juridiksionit të Përgjithshëm Tiranë. Pas kryerjes së veprimeve të para hetimore, me shkresën nr 5976/k, datë 27.02.2023 janë referuar materialet proceduriale në lidhje me rastin në Prokurorinë pranë Gjykatës së Shkallës së Parë të Juridiksionit të Përgjithshëm Tiranë.
Gjithashtu, nga shërbimet e Seksionit për Hetimin e Narkotikëve nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, gjatë kësaj periudhe janë finalizuar dy operacione të koduara “Tempull 2” dhe “Tempull 3”, ku ndër të tjera janë arrestuar 5 persona të cilin ushtronin profesionin si taksistë në kompan I të ndryshme taksish në qytetin e Tiranës. “ –thuhet në shkresë.
E njëjta shkresë, me të njëjtat pyetje iu adresua edhe Drejtorisë së Përgjithshme të Policisë së Shtetit. Në përgjigje, DPPSH sqaron se Policia e ka ndjekur problemin dhe se Policia Rrugore ka ndërmarrë menjëherë pas dokumentarit një sërë kontrollesh në planin “Roadpol”, ku janë gjetur me shkelje 142 shoferë taksish. PSH megjithatë sqaron se nuk është detyra e Policisë evidentimi i problemeve që lidhen me kompanitë, por vetëm me shoferët gjatë drejtimit të automjeteve në rrugë.
“Përveç kontrolleve të përditshme ndaj kësaj kategorie biznesi, në ditët e ushtrimit të detyrave të këtij plani operacional, nga shërbimi i Policisë Rrugore u kontrolluan autoveturat e shërbimit “Taxi”, në shkallë vendi, lidhur me dokumentacionin e nevojshëm për qarkullim. Nga kontrollet rezultoi se në përgjithësi ky dokumentacion ishte i plotë, me përjashtim të rasteve ku disa operatorë dhe drejtues mjeti u konstatuan në shkelje rrugore si: mospajisja me licenca, mospajisja me leje drejtimi të kategorisë përkatëse dhe mospajisja me siguracion të detyrueshëm (TPL).
Konkretisht, u kontrolluan rreth 1680 autovetura taksi dhe u konstatuar në shkelje rreth 142 drejtues mjetesh dhe operatorë, që u ndëshkuan sipas neneve 81, 82/4, 85, 86, 91, 123, 124, 167 dhe 178 të Kodit Rrugor. Policia Rrugore, përveç dinamikës së përditshme të punës mbi këtë kategori biznesi, ka planifikuar intensifikim të kontrolleve, pavarësisht se mbikëqyrja dhe kontrollet në fushën e transportit publik të udhëtarëve, nuk janë përgjegjësi vetëm e Policisë Rrugore, sepse referuar Kodit Rrugor dhe ligjit “Për transportin në RSH”, kjo përgjegjësi iu takon dhe Policisë Bashkiake, Policisë Tatimore dhe Sektorit kundër Krimit Ekonomiko-Financiar. Misioni dhe detyra kryesore e strukturave të Policisë Rrugore është kryerja e shërbimeve të drejtpërdrejta për rregullimin e trafikut, konstatimi dhe ndëshkimi i shkeljeve me burim të shtuar rreziku dhe parandalimi i aksidenteve me pasoja për jetën dhe shëndetin e qytetarëve.”-thuhet në përgjigje.
