Bashkia e Tiranës ka zgjeruar trotuarin pranë Shallvareve duke u falur qytetarëve një hapësirë më të gjerë në dispozicion.
Kryebashkiaku i Tiranës, Erion Veliaj inspektoi sot punimet për zgjerimin e trotuareve në “Ibrahim Rugova” dhe vlerësoi faktin se edhe ky investim shkon në favor të këmbësorëve dhe personave me aftësi ndryshe.
“Ajo që kemi vënë re në të gjitha rrugët ku shtohen hapësirat pedonale ka më shumë biznes, ka më shumë ekonomi, ka më shumë xhiro. E kemi vënë re tek “Myslym Shyri”, e kemi vënë re te Pazari i Ri, te sheshi “Skëndërbej”, në çdo rrugë që përshkohet nga një trotuar i mirë ose nga një korsi biçikletash”.
Veliaj shtoi se projekti i radhës është ndërhyrja në parkun “Rinia”, i cili do t’i nënshtrohet një ndërhyrjeje totale nga Agjencia e Parqeve dhe Rekreacionit. Kjo hapësirë sipas tij do të transformohet në një mundësi për më shumë argëtim për fëmijët dhe të rriturit.
“Në parkun Rinia do të bëjmë një sistemim total. Jam i ndërgjegjshëm se është një park shumë i frekuentuar, por ka nevojë të vihet dorë. Me të njëjtën mënyrë siç kemi vënë dorë tek liqeni dhe kemi transformuar gjithë hapësirën atje, ashtu do të transformojmë edhe parkun “Rinia”.
