Askush nuk e zgjedh dot se për cilin person duhet të të rrahë zemra fort! Menjëherë sapo e sheh ndjen fluturat në stomak, sytë të shkëlqejnë dhe je e/i bindur se ai/ajo është personi me të cilin/ën do të kalosh çdo ditë të jetës tënde. E për disa të famshëm shqiptarë, zemra nuk pyeti për kufinj e shtetësi! Ama kjo nuk përbën aspak problem, pasi ata iu drejtuan altarit dhe kurorëzuan në martesë historinë e tyre të dashurisë. Dhe sot, shumë prej tyre janë lumturisht të martuar dhe të bekuar me vogëlushë e vogëlushe.
Afërdita Dreshaj
Afërdita Dreshaj i dha fund beqarisë më 30 qershor 2018. Këngëtarja u betua për dashuri të përjetshme me hokeistin çek Jakub Kindl në një ceremoni madhështore të organizuar në Miami.
Kledi Kadiu
Buzë liqenit të Braçiano- s në Romë, balerini shqiptar Kledi Kadiu u martua me partneren e tij 18 vite më të re, francezen Charlotte Lazzari. Dyshja e njohur bashkëjeton prej shumë vitesh dhe janë prindër të një vajze 2- vjeçare, Lea.
Angela Martini
Biznesmeni rumun Dragos Savulescu i rrëmbeu zemrën modeles simpatike shqiptare Angela Martini. Ata u martuan krejt papritur në Las Vegas në prani të këngëtares shqiptare Bleona dhe një prej miqve të tyre më të ngushtë. Angela nuk ishte aspak një nuse tipike tradicionale, teksa preferoi të vishej me një fustan të zi të markës Christian Dior. Disa javë më pas, çifti publikoi edhe klipin e tyre të dasmës, që dukej një minifilm i regjistruar nën tingujt e këngës “Him and I”.
Almeda Abazi
Almeda Abazi dhe aktori i famshëm turk, Tolgahan Sayisman, kurorëzuan me martesë lidhjen e tyre të dashurisë. Çifti është martuar në Los Angeles të Shteteve të Bashkuara të Amerikës, pikërisht në ditën kur ish Miss Shqipëria festonte 25-vjetorin e lindjes, më 13 shkurt 2017. Në ceremoninë martesore të zhvilluar në një tarracë në Beverly Hills ishin të pranishëm 40 të ftuar, kryesisht familjarë dhe miq të ngushtë.
Armir Shahini
Pjesëtari i grupit WSF, Armir Shahini braktisi Shqipërinë, pasi u dashurua me një shtetase gjermane, e cila quhet Rabean Shahini. Sot ata janë lumturisht të martuar dhe janë të bekuar me një vajzë.
Anjeza Shahini
Këngëtarja e njohur shqiptare, Anjeza Shahini i tha “Po” shtetasit britanik Paul EdWard Conolly, pas historisë së tyre disa vjeçare të dashurisë. Dasma madhështore u mbajt me 7 shtator 2015 në Toskana të Italisë.
Lorik Cana
Edhe përse kishte deklaruar se do të merrte vajzë shqiptare për grua, arkitekja italiane ia zbuti zemrën dhe ai e harroi krejtësisht atë dëshirë. Bëhet fjalë për futbollistin Lorik Cana, i cili lidhi kurorë me Monikën, në dy ceremoni private pa bërë shumë bujë në media. Ata fillimisht ndërruan unazat në Itali dhe më pas organizuan dasmën në Tiranë në vitin 2014.
Emina Cunmulaj
Në vitin 2015, modelja shqiptare Emina Cunmulaj dhe partneri i saj Sam Nazarian u martuan në një ceremoni private në hotelin e Nazarian në qendër të Los Angeles. Multimilioneri iranian dhe modelja tashmë janë prindër të dy vogëlusheve, Mia dhe Ella.
*Kujdes! Ndalohet riprodhimi i këtij materiali pa lejen e redaksisë së Iconstyle.al
Burimi: Iconstyle.al
