Zbulohet biseda 90 minutëshe, çfarë i rrëfeu Xhuljeta psikologes pak ditë para se të ekzekutohej nga Xhaferr Mata

Xhuljeta Çuni e kishte paralajmëruar tragjedinë një muaj më parë, teksa ngjiti shkallët e prokurorisë për të denoncuar ish të dashurin e saj Xhaferr Mata, i cili i mori jetën mëngjesin e  8 qershorit në zonën e “Don Boskos”. 19-vjeçarja kishte zhvilluar edhe një bisedë 90 minutshe, me psikologen e këtij institucioni.

“Me Xhaferin u njoha para një viti. Ai kishte miqësi me kushërinjtë e mi. E respektoja, sepse jetonim në të njëjtën lagje”,- tha Xhuljeta.

Përpara psikologes, ajo kishte mohur se ishte në një marrëdhënie intime me Matën, madje ishte shprehur se ai e akuzonte se kishte përfituar financiarisht prej tij dhe kërkonte t’i kthente 1500 paund.

A ndihesh e frikësuar për jetën? Të ka dhunuar ndonjëherë?, e pyet psikologia, bën të ditur “Ballkanweb”.

“Jo, s’kam frikë për veten. Më shumë kam merakun e familjes. Shqetësohem se mund ta marrë vesh babai. Ai është emigrant. Sa për mua Xhaferi më premtoi në polici se nuk do të më shqetësonte”- është shprehur vajza.

“Përse shkove në polici Xhuljeta?”-e pyet psikologia.

”Sepse doja ta trembja Xhaferrin. Më ndali në rrugë. I thashë do të denoncoj. Më tha bëje denoncimin. Do vij dhe unë me ty. Në korridorin e komisariatit fola prapë më të dhe i thashë jam e gatshme të mos bëj denoncim. Vazhdoje atë që ke nisur. Unë nuk të bezdis më. Pas kësaj u larguam”. – ka thënë Xhuljeta.

Rrëfimi i Xhuljeta Çunit është pjesë e dosjes hetimore, që prokuroria kishte hapur ndaj Xhaferr Matës, për akuzën e përndjekjes dhe dhunës psikologjike. Edhe përse Xhuljeta e kishte denoncuar, autori Xhaferr Mata ishte proceduar në gjendje të lirë nga Policia.