Zbardhen detaje të reja lidhur me ngjarjen e rëndë të ndodhur në fshatin Palasë të Maliqit, ku 45-vjeçari Eduard Çarçani u gjet i pajetë në kangjellat e murit rrethues të një banese. Sipas burimeve nga policia dhe dëshmive të banorëve, ngjarja dyshohet të ketë ndodhur aksidentalisht, ndërsa viktima mund të ketë qenë në gjendje të dehur në momentin tragjik.
Një banor i zonës ka deklaruar se Çarçani kishte jetuar për shumë vite në Itali bashkë me familjen e tij dhe ishte kthyer prej pak kohësh në Shqipëri. “Ne nuk dimë shumë. Ai jetonte më shumë në Itali, pak kohë qe ka ardhur. Kishte problemet e tij, pinte shumë. Djali kishte shumë vite që jetonte në Itali me të ëmën dhe motrën, edhe dajat andej i kishte. Shtëpia ishte e pabanuar,” – u shpreh banori.
Nga hetimet paraprake dyshohet se 45-vjeçari ka tentuar të hyjë në oborrin e banesës, e cila nuk ishte e tij, duke kaluar nga muri. Gjatë kalimit, bluza i është kapur në kangjella, duke i bllokuar frymëmarrjen dhe shkaktuar vdekjen e menjëhershme.
Policia e Maliqit dhe grupi hetimor ndodhen ende në vendngjarje për të sqaruar të gjitha rrethanat e ngjarjes, ndërsa trupi i pajetë i Çarçanit është dërguar në morg për ekzaminime mjeko-ligjore. Hetimet vijojnë për të përcaktuar nëse bëhet fjalë për një aksident tragjik apo një ngjarje me motive të tjera.
