Kryeministri Edi Rama i kërkoi drejtuesve të zyrave arsimore në vend që ta bëjnë ditën natë e të respektojnë protokollin e masave anti-covid me hapjen e shkollave.
Kreu i qeverisë tha se mësimi do zhvillohet deri në 3 turne, ku rreth 1097 shkolla do të bëjnë mësim me 1 turn, 472 me 2 turne, dhe 183 shkolla kanë tre nënturne.
Në klasa në mënyrë absolute duhen respektuar rregullat dhe nuk duhet të ketë më shumë se 20 nxënës. Për ato me mësim të kombinuar, klasat do zhvillohen një herë në ambient dhe një herë online dhe do të vlerësohen vetëm në shkollë.
“Është sfida më e madhe për t’u kapërcyer në këtë vit shkollor, duke pasur parasysh se çfarë rëndësie madhore ka shëndeti i të gjithëve dhe duke pasur parasysh që fëmijët nuk janë të imunizuar plotësisht nga ky virus dhe pavarësisht faktit që marrja e virusit nga ata është më pak e rrezikshme, sesa për më të mëdhenjtë, zinxhiri i transmetimit nuk ndërpritet aty. Kështu që duke parë së çfarë ndodh nëpër botë, duke analizuar dhe numrat, padiskutim që jemi të shqetësuar lidhur me domosdoshmërinë për një nivel maksimal performance në drejtimin e shkollave, për këtë MAS ka kryer një punë të thelluar dhe ka vënë në dispozicion një udhëzues goxha të detajuar për fillimin e vitit shkollor, por përtej çfarë është studiuar dhe analizuar me shumë përgjegjësi, suksesi në zbatimin e tij lidhet me dyfishimin e energjive që ju dhe të gjithë skuadrat tuaja së bashku me drejtuesit e shkollave dhe mësuesit, duhet të vini në dispozicion të këtij viti. Duhet ta bëni natën ditë, pa u lodhur dhe të jeni në krye të detyrës në terren për të ndjekur me rigorozitet zbatimin e udhëzuesit nga gërma e parë në gërmën e fundit dhe këtu nuk është më çështja për të kryer një detyrë shtetërore, por për të qenë në këtë detyrë shtetërore në lartësinë e një humanizmi të spikatur dhe për të qenë shembull dhe burim kurajoje dhe burim energjie e besimi për të gjithë njerëzit e sistemit arsimor, që nga drejtuesit e shkollave deri te të gjithë mësuesit, përfshirë edhe prindërit. Kjo do të thotë që udhëzuesin jo vetëm duhet ta mbani mirë parasysh në çdo paragraf të tij, por duhet ta mishëroni ju të parët. Funksionimi i shkollës, do të jetë ndryshe nga vitet e tjera dhe do të funksinojnë deri në 3 turne. 1097 shkolla kanë 1 turn, 472 me 2 turne, 183 shkolla kanë tre nënturne. Në klasa në mënyrë absolute duhen respektuar rregullat dhe nuk duhet të ketë më shumë se 20 nxënës. për ato me mësim të kombinuar klasat do zhvillohen një herë në ambient dhe një herë online dhe do të vlerësohen vetëm në shkollë. Shtohen detergjenët, maskat, termometrët do të ketë edhe një person të dedikuar nga sistemi i shëndetit publik pranë shkollës. Personat e dedikuar duhet të jenë kontakti juaj i përditshëm, jo për t’i pyetur formalisht, as për t’i shtuar presionin normal të kësaj pune, por për t’i inkurajuar dhe për t’iu gjendur pranë”, shprehet Rama.
Kryeministri Edi Rama ka bërë me dije se mbajtja shkollave të mbyllur, nuk ka qenë një opsion nga ana e qeverisë. Ai tha se është e pritshme që numri i të infektuarve do të rritjet, nisur nga eksperienca e vendeve të tjera, por e gjitha varet nga mënyra se si do të respektohen masat.
“Numrat vetëvetiu do të rriten, këtë e dimë nga praktikat ndërkombëtare dhe analiza e arsyeshme e faktorëve që nxisin rritjen e numrave, një hapje e madhe brenda gjithë hapësirë tani më të hapur të Shqipërisë, që do të shtojnë numrat, por ka rritje e rritje dhe mbi të gjitha ka rritje që vjen si rezultat i mungesës së bërjes së të gjitha yzmeteve të nevojshme që është një rritje katastrofike, ka dhe një rritje objektive që vjen si rezultat i një përballje të përditshme me këtë armik të padukshëm. Ne duam të dytën, shkollën nuk e rrethojmë dot me mure të atilla që të mos lejojë hyrjen e virusit, por nga mënyra se si do të bëhet puna, do të varet shumë pjesa tjetër, rezultati dhe rezultati nuk është një notë, por është shëndeti i fëmijëve. Mbajtja mbyllur e shkollave nuk ishte opsion dhe këtë na e thotë eksperienca e të gjitha vendeve”, tha Rama.
Ndonëse mbajtja mbyllur e shkollave nuk ishte opsion, mësimi online ishte, të paktën deri sa të bëheshin vaksinat për gripet sezonale. Ai rezultoi të jetë një dështim i Ministrisë së Arsimit, edhe pse nxënësit, e mësuesit janë ushqyer prej vitesh me idenë e shkollave dixhitale. Dhe kur erdhi koha e duhur për t’i përdorur ato në pandemdi, mësimi online dështoi.
Me hapjen e shkollave, rekomandohet të ndiqet protokolli bazë për pandeminë. Nxënësit duhet të jenë të pajisur me maska dhe të ruhet distanca sociale. Hapja e shkollave pritet të sjellë sfida të reja me rikthimin në shkollë të të gjithë nxënësve, të cilët mund të rrezikojnë jetën e tyre, të prindërve apo të mësuesve me një papërgjegjshmëri të vogël.
