Gjatë një konference për mediat, Drejtori i Policisë së Shtetit, Muhamet Rrumbullaku tregoi detaje nga operacioni “Never Forget” që çoi në zbardhjen e 16 ngjarjeve kriminale ku ka marrë pjesë banda e drejtuar nga Laert Haxhiu.
I penduari Artan Tafani, i cili u arrestua pasi grabiti 30,000 euro në një pikë këmbimi valutor në Astir, ka pranuar të bashkëpunojë me policinë duke listuar krimet.
Ndër të tjera, ai ka zbardhur edhe vendosjen e tritolit më 8 Qershor 2022, që hodhi në erë lokalin e Noizy-t (Rigels Rajku), në pronësi të babait të reperit.
Rrumbullaku deklaroi se autorët që vendosën tritolin në lokalin e familjes Rajku janë Laert Haxhiu, Artan Tafani (39 vjeç), Lulëzim Spahia (Arapi) 28 vjeç dhe Erisian Abedini (32 vjeç).
Asokohe, ngjarja ndodhi fiks pas përplasjes fizike që Noizy dhe Cllevio patën në Durrës. Shpërthimi ndodhi rreth orës 04:24, në lagjen Nr.13 të Durrësit, duke shkaktuar dëme të mëdha jo vetëm në lokal, por edhe tek dyqani i rrobave të Noizy-t.
Kleviol Ahmeti (Cllevio) është më origjinë nga Lushnja, nga i njëjti vend ku ka rrënjët edhe banda e Laert Haxhiut. Kujtojmë se asokohe, ai u arrestua nga policia, por ende nuk ka prova të bëra publike që i lidhin dy ngjarjet me njëra tjetrën.
