Ngjarja e rëndë që tronditi kryeqytetin natën e të enjtës mbrëma ku një person mbeti i vrarë dhe u plagosën dy të tjerë vazhdon të jetë një mister për mënyrën se si ndodhën ngjarjet.
Megjithatë “News 24” dhe “Balkan Web” kanë arritur të zbardhin dëshminë e Redi Popeskut, pronarit të lokalit “Monopol” ku ndodhi ngjarja e rëndë. Si dëshmitar okular Popesku ka treguar me detaje se si ndodhi takimi mes grupit të Ervis Martinaj dhe atij të Ervin Matës.
Redi Popesku në dëshminë e tij ka thënë se fillimisht Ervin Mata kishte kërkuar takimin me Martinaj për të sqaruar një konflikt mes tyre.
“Mesa kuptova ka qenë një konflikt ordiner për t’u sqaruar në lidhje me ngacmimin e së dashurës së Ervin Matës, Elvana Gjata. Gjithashtu dua të sqaroj momentin që para se të vinte Ervis Martinaj, mua më tha Ervin Mata, nëse e kisha problem që ai të vinte tek dyqani im. I thashë se nuk kishte problem, pasi Martinajn e kisha të njohur. Dua të sqaroj se të dy këta persona, si Ervin Mata dhe Ervis Martinaj u takuan normalisht dhe nuk dhanë asnjë shenjë për konflikt. Pra u takuan miqësisht dhe nuk kishin tendencë që të tregonte se situata do agravonte siç ndodhi”- sqaroi Popesku.
Më tej ai tha se sherri filloi mes komandos Meviol Bilo që shoqëronte Matën dhe njërit prej djemve që shoqëronte Martinajn. Pas debateve verbale, personi që shoqëronte Martinajn nxorri i pari armën dhe qëlloi.
Gjithashtu Popesku tha se Ervis Martinaj kishte mbërritur në lokalin e tij me një makinë tip BMWtë zezë.
Krimi ka ndodhur në zonën VIP të lokalit, e cila nuk është e pajisur me kamera sigurie. Në lokal gjithashtu nuk ka pasur asnjë kamarier dhe palëve u ka shërbyer vetë pronari i lokalit.
Deri më tani e vetmja mënyrë për të zbardhur ngjarjen janë dëshmitë dhe kamerat e jashtme të lokalit.
Por pavarësisht se thuhet se sherri filloi për motive banale, prokuroria nuk e përjashton mundësinë që mes grupeve të ketë pasur edhe konflikte të mëparshme dhe kanë shfrytëzur momentin për larje hesapesh.
