Një nënë e dy fëmijëve vrau bashkëshortin e saj në mes të rrugës, dy ditë më parë në Milot dhe tashmë rrëfimi i saj zbulon se gjithçka erdhi nga dhuna dhe vesi i tij për të luajtur kumar.
35-vjeçarja Violeta Donaj qëlloi me katër plumba bashkëshortin e saj 42-vjeçar, Kujtim Donaj, në tregun e Milotit mëngjesin e së dielës.
E pyetur nga policia se ku e gjeti armën, Violeta deklaroi se e kishte marrë te makina që përdornin bashkëshortët.
Nga dëshmia e saj në polici, “Panorama” ka zbardhur këtë deklaratë:
“Nuk e di sesi e bëra, thjesht kujtoj që mora pistoletën dhe e qëllova. Isha e lodhur nga sjellja e tij, duke luajtur bixhoz dhe duke na krijuar probleme ekonomike e më pas ishte bërë shumë xheloz. U takuam për të vijuar si çdo herë punën tonë, por patëm një debat dhe unë kam hyrë në makinë (familjare), aty kam gjetur pistoletën, të cilën e mora me vete dhe shkova te tregu dhe e kam qëlluar.
Nuk e dija se çfarë po bëja, por e kam parë bashkëshortin e shtrirë dhe kuptova se i kisha dhënë fund gjithçkaje, edhe jetës së familjes sonë. Fillova të dridhesha dhe më pas e kam parë veten të futur në një makinë, derisa erdhi policia. Kishim probleme. Mundohesha t’i fshihja duke menduar se gjërat do të rregulloheshin, por nuk ndodhi. Ajo që bëra ishte një moment dobësie dhe lodhje e madhe, duke e përjetuar problemin në familjen tonë”.
