Një ngjarje e rëndë u rregjistrua pasditen e së premtes në fshatin Resulaj të Vlorës. Autori 24-vjeçar Ridvan Zykaj ka ekzekutuar me gjakftohtësi 8 persona, të familjes Zykaj.
Sipas “Top Channel”, autori i krimit makabër ka hyrë i armatosur në shtëpinë e vëllait të gjyshit dhe ka qëlluar me breshëri automatiku tek e gjithë familja. Ndërsa me shpejtësi ka shkuar edhe tek shtëpia e xhaxhait tjetër, që ndodhej 30 metra larg, ku ekzekutoi edhe të gjitha familjen me katër pjesëtarë.
“Autori ka vrarë vellain e gjyshit të tij, Demirin, 76 vjeç, dhe gruan e tij, Perri, 78 vjeç, si dhe ka vrare dy djemtë e Demirit. Ka vrarë djalin e Demirit: Azemin, 49 vjeç, dhe gruan e tij, Aferdita, 47 vjeç. Si dhe djalin tjetër te Demirit : Besimin, 45 vjeç, dhe gruan, Vasilika, 40 vjeç e tij si dhe dy femijet e tyre Sarën, 15 vjeç dhe Ledjonin rreth 6 vjeç.”- shkruhej në njoftimin për shtyp.
Prindërit e autorit janë të shoqeruar në Polici dhe po merren në pyetje në lidhje me rrethanat e ngjarjes. Autori 24-vjeçar Ridvan Zykaj u largua me shpejtësi nga vendi i ngjarjes, ndërsa po kërkohet nga forca të shumta policie të Drejtorisë së Policisë së Vlorës. Forcat e Ndërhyrjes së Shpejtë që ndodhen po në këtë qark kanë dalë në aksion për kapjen e tij, pasi konsiderohet tejet i rrezikshëm dhe i armatosur.
