Roger Federer po tërhiqet nga tenisi në moshën 41-vjeçare pas një sërë operacionesh në gjunjë, duke mbyllur një karrierë në të cilën ai fitoi 20 tituj Grand Slam, përfundoi pesë sezone në vendin e parë dhe ndihmoi në krijimin e një epoke të artë të tenisit për meshkuj me rivalët Rafael Nadal dhe Novak Gjokoviç.
“Siç e dini shumë prej jush, tre vitet e fundit më kanë paraqitur sfida në formën e lëndimeve dhe operacioneve,” tha Federer të enjten në një postim në llogaritë e tij në mediat sociale. “Kam punuar shumë për t’u rikthyer në formën e plotë. Por gjithashtu i njoh kapacitetet dhe kufijtë e trupit tim dhe mesazhi i tij për mua kohët e fundit ka qenë i qartë.
“Unë jam 41 vjeç. Kam luajtur më shumë se 1500 ndeshje gjatë 24 viteve. Tenisi më ka trajtuar më bujarisht sesa do të kisha ëndërruar ndonjëherë, dhe tani duhet të kuptoj se kur është koha për t’i dhënë fund karrierës sime”.
Federer tha se ai synon të vazhdojë të luajë tenis, “por jo vetëm në Grand Slams ose në turne”. Ai nuk kishte luajtur një ndeshje konkurruese që nga arritja në çerekfinale në Wimbledon në 2021 dhe njoftoi në mes të gushtit se kishte pësuar një operacion tjetër në gju.
Por ai ishte shfaqur në një ngjarje që shënonte 100 vjetorin e Centre Court në All England Club në korrik dhe tha se shpresonte të kthehej për të luajtur atje “një herë tjetër”. Ai gjithashtu kishte thënë se do të kthehej në turneun në Swiss Indoors në tetor.
“Ky është një vendim i hidhur, sepse do të më mungojë gjithçka që më ka dhënë turneu”, tha Federer. “Por në të njëjtën kohë, ka shumë për të festuar. Unë e konsideroj veten një nga njerëzit më me fat në tokë. Mu dha një talent të veçantë për të luajtur tenis dhe e bëra atë në një nivel që nuk e kisha imagjinuar për shumë kohë, më gjatë se sa kam menduar ndonjëherë të jetë e mundur.”
