Vetëm 17 vjeçe, Billie Eilish po përjeton një sukses që shumë as që do ta ëndërronin.
Këngëtarja që po thyen rekordet me hite si “Bad Guy” (I keqi), apo “Burry a friend” (Të fusësh një mik në varr) është e njohur për stilin ekscentrik të teksteve dhe klipeve, ku guxon me tematika që nga seksualiteti, sadizmi e mazokizmi, tek ankthi e depresioni.
Duket sikur flokët blu dhe veshjet e gjera janë zgjedhja më e përshtatshme për imazhin e saj publik prej vajze rebele, megjithatë Billie ka një arsye shumë më personale për t’u veshur gjithmonë me veshje extra large.
Imazhi më i ri i fushatës së Calvin Klein, foli hapur për zgjedhjet e saj të stilit, duke sqaruar se poshtë shtresave të rrobave, fshihen komplekset e një adoleshenteje për trupin. Në syrin e publikut gjatë gjithë kohës, Billie Eilish druhet se njerëzit mund të shkruajnë gjëra aspak të këndshme për trupin e saj ndaj parapëlqen ta evitojë.
“Nuk dua që bota të dijë gjithçka për mua. Prandaj vesh rroba të gjera: askush s’mund të krijojë një opinion sepse askush s’e ka parë çfarë ka poshtë. Më kupton?”, u shpreh Billie Eilish në spotin më të ri të Calvin Klein, “Askush s’mund të thotë: “Ajo është e dobët”, “Ajo s’është e dobët”, “Ajo s’ka b****” apo “Ajo ka gjithë atë b****”. Askush s’mund ta thotë, sepse ata s’e dinë”.
Billie është treguar edhe më parë e hapur në lidhje me pasiguritë e saja.
Një video në të cilën Billie kapsallit sytë gjatë intervistave të ndryshme, u bë virale në internet muajve të fundit.
Për këtë, Billie zgjodhi të tregonte hapur e ftuar tek “Ellen Degeneres Show”, se ka sindromën Tourette, që e shkakton të bëjë gjeste të pavetëdijshme si hapja e syve apo ngritja e vetullave.
Për këtë, ajo tregoi se përpiqet ta fshehë gjatë intervistave, megjithatë kur mendon se nuk po e xhirojnë, e lëshon veten dhe mund ta shikosh duke kryer veprime të pakontrolluara. Pak a shumë, si të gjithë ne!
