FIFA mori dje vendimin për dy futbollistët shqiptarë, Granit Xhakën dhe Xherdan Shaqirin, të cilët festuan me simbolin e shqiponjës pasi shënuan golat për Zvicrën në ndeshjen kundër Serbisë.
Dy futbollistët shqiptarë, por edhe kapiteni Lishtajner u gjobitën nga FIFA me gjobë, 5.000 franga zvicerane për këtë të fundit dhe 10.000 franga zvicerane për Xhakën dhe Shaqirin.
Megjithatë, Xhaka dhe Shaqiri nuk do të paguajnë asgjë, pasi një iniciativë e dy kosovarëve, Drin Zatriqit dhe Rilind Rekës, për ngritje fondesh për të paguar gjobën ka gjetur përkrahje të gjerë edhe mes përfaqësuesve të politikës.
Vlora Çitaku, ambasadorja e Kosovës në SHBA, është treguar e gatshme për të kontribuuar në vlerë monetare për shlyerjen e një pjese të kësaj gjobe e bashkë me të edhe shumë politikanë të tjerë. Edhe Shkelzen Dragaj, këshilltar i Kryetarit të Kuvendit të Kosovës, Kadri Veseli, gjithashtu është treguar i gatshëm për të dhënë një pjesë parash, ndërsa ministri i Tregtisë dhe Industrisë në Kosovë, Bajram Hasani, ka vendosur në dispozicion pagën e tij.
“Nuk paguhen me para emocionet që na dhanë Granit Xhaka e Xherdan Shaqiri, kur festuan me shqiponjë, pas golave të tyre në ndeshjen Zvicër-Serbi. Ata u dënuan vetëm sepse nuk harruan rrënjët e tyre, nuk harruan nga vijnë. Jo se ata nuk i kanë mundësitë financiare për ta paguar një dënim të tillë, por ndjenja e krenarisë që na dhanë me golat e tyre, më bën të ndihem i detyruar që një pagë timen ta ndaj për pagesën e kësaj gjobe. Vazhdoni djema e na bëni krenarë!”, shkruan ministri Hasani në Facebook.
