Gjykata e Durrësit ka vendosur masën “arrest me burg” për Çlirim Shahollin, i cili të premten vrau nënën e gjashtë fëmijëve të tij, Adriana Shahollin. Gjatë seancës, ai pranoi se e kishte dhunuar disa herë bashkëshorten, pasi ishte shumë xheloz. 43-vjeçari është shprehur se ka përplasur kokën e bashkëshortes në dysheme, pasi e akuzonte 40-vjeçaren se kishte një lidhje jashtëmartesore me pronarin e biznesit ku po punonte prej pak muajsh për të siguruar të vetmet të ardhura në familje, bën të ditur “Panorama”.
“E shtyva dhe kur ra në tokë ia përplasa kokën në dysheme disa herë”, ka thënë në sallën e gjyqit 43-vjeçari Shaholli nga Maliqi i Korçës e me banim në Durrës.
Edhe përse e ka dërguar më pas bashkëshorten në spital, ajo nuk mundi të mbijetonte për shkak të plagëve të marra në kokë. 43-vjeçari u shpreh se nuk kishte si qëllim të vriste bashkëshorten dhe u kërkoi falje gjashtë fëmijëve, të cilët i la jetim.
“Gjithçka ishte momentale dhe aksidentale. Jam penduar për veprimin tim. U kërkoj falje fëmijëve dhe gjithë familjarëve të mi për këtë gabim fatal që unë bëra. Nuk di çfarë te them, të vendos drejtësia. Më vjen shume keq që lash fëmijët jetim mes katër rrugëve”, – ka thënë Çlirim Shaholli para trupit gjykues.
Sakaq, në seacën e mbajtur në Gjykatën e Durrësit nuk ka qënë i pranishëm asnjë nga familjarët e tij, të cilët e kanë braktisur pas këtij akti të rëndë.
