Një ngjarje e rëndë u regjistrua mëngjesin e sotëm ku 40-vjeçarja Enkelejda Danaj u vra me thikë nga bashkëshorti i saj në Athinë. Ajo u godit brutalisht me thikë në bark dhe ndërroi jetë në vendngjarje.
Eduart Danaj, vrasësi i Enkelejdës, është arrestuar nga policia mesditën e sotme.
Sipas informacioneve ai u arrestua në një objekt të braktisur afër stacionit të policisë në lagjen Filis, ku nuk bëri rezistencë.
Poashtu është bërë me dije se viktima kishte përmendur në denoncimet e saj se 50-vjeçari konsumonte sasi të mëdha alkooli dhe po bëhej i dhunshëm, ku si pasojë e ka goditur dhe e ka kërcënuar.
Hera e fundit që gruaja ka kaluar pragun e komisariatit për ta denoncuar sërish për dhunë në familje (kanosje, lëndim fizik dhe fyerje) ka qenë më 7 maj 2024. Më pas burri është arrestuar dhe dërguar në prokurori, ndërsa ka marrë një thirrje për në gjyq për të premten 17 maj 2024.
Një dëshmimtar ka treguar se pas vrasjes së Enkelejdës, ka mbërritur në vendngjarje e bija, e cila filloi të qajë dhe të bërtasë në polici dhe të thotë “largohu mendoj se është nëna ime”, më pas ka kërkuar ndihmë, duke qarë dhe duke folur në telefon me vëllain e saj gjithashtu të mitur duke i thënë, “babai me siguri ka vrarë mamin”!
