Vetëm pak ditë më parë mbarë opinioni u trondit nga ngjarja shokuese që ndodhi në mes të tregut të Milotit, ku Violeta Donaj vrau me armë zjarri bashkëshortin e saj 42-vjeçar, Kujtim Donaj. 35-vjeçarja është paraqitur sot përpara Gjykatës ku është marrë edhe vendimi në lidhje më çështjen e saj.
Violeta është shfaqur në gjendje të rënduar para togave të zeza dhe ka shpërthyer në lot teksa ka qenë në pritje të vendimit.
Sipas “Gazetës Shqiptare” 35-vjeçarja është dënuar me arrest me burg dhe çështja i ka kaluar Krimeve të Rënda.
E penduar Violeta ka kërkuar falje para gjykatës, por pavarësisht kësaj lutjet e saj nuk janë marrë parasysh.
Në dëshminë e saj në gjykatë 35-vjeçarja ka treguar se është e vërtetë që ai e keqtrajtonte dhe se ata kishin shumë probleme në çift, por nuk e besonte kurrë që të shkonte deri në atë pikë, saqë të vriste babanë e fëmijëve të saj.
Ndërsa në dëshminë e dhënë në polici, Violeta ka treguar edhe gjithë arsyet që e çuan drejt aktit të rëndë.
“Nuk e di sesi e bëra, thjesht kujtoj që mora pistoletën dhe e qëllova. Isha e lodhur nga sjellja e tij, duke luajtur bixhoz dhe duke na krijuar probleme ekonomike e më pas ishte bërë shumë xheloz. U takuam për të vijuar si çdo herë punën tonë, por patëm një debat dhe unë kam hyrë në makinë (familjare), aty kam gjetur pistoletën, të cilën e mora me vete dhe shkova te tregu dhe e kam qëlluar. Nuk e dija se çfarë po bëja, por e kam parë bashkëshortin e shtrirë dhe kuptova se i kisha dhënë fund gjithçkaje, edhe jetës së familjes sonë. Fillova të dridhesha dhe më pas e kam parë veten të futur në një makinë, derisa erdhi policia. Kishim probleme. Mundohesha t’i fshihja duke menduar se gjërat do të rregulloheshin, por nuk ndodhi. Ajo që bëra ishte një moment dobësie dhe lodhje e madhe, duke e përjetuar problemin në familjen tonë”,l mësohet të ketë thënë Violeta në polici.
Burimi: Gazeta shqiptare
