Dy ditë më parë një ngjarje e rëndë tronditi vendin pasi Hekuran Rrasa qëlloi me armë gjahu bashkëshorten Fëllënxa Rrasa e më pas veten.
Ndërkohë ditën e sotme është zbardhur dinamika e krimit në Divjakë.
Sipas “News 24”, policia dyshon se ky është një krim i paramenduar dhe jo ashtu si është thënë nga të afërmit dhe fqinjët se ngjarja ka ndodhur pas një konflikti të çastit.
Theksohet se shkak për këtë është fakti që autori i krimit, Hekuran Rrasa, para ngjarjes ka larguar nga banesa djalin e tij, duke i thënë që të shkonte të pinte një kafe dhe me pretendimin se donte që t’i blinte një paketë cigaresh.
Pasi ka larguar djalin, ai ka marrë bashkëshorten, e ka çuar te dhoma e gjumit, ku edhe i ka marrë jetën.
Gjithashtu policia dyshon se përpara se të ndodhte vrasja, mes çiftit ka pasur një konfrontim fizik, pasi rrobat e gruas janë gjetur të shqyera.
Më pas, burri ka qëlluar gruan me armë në fytyrë në dhomën e gjumit, ndërsa pak minuta më vonë është dëgjuar një krismë tjetër, ku Hekuran Rrasa ka bërë vetëvrasje.
Trupat e pajetës të çiftit janë gjetur në dhomën e gjumit.
Ndërkohë arma e gjahut është gjetur pranë trupit të Hekuran Rrasës dhe është mësuar se këtë armë ai e kishte prej shumë vitesh.
