Një ngjarje e rëndë ka tronditur pasditen e sotme kryeqytetin, ku një person ka humbur jetën pas një sherri të ndodhur në zonën e Komunës së Parisit. Ngjarja ka ndodhur rreth orës 15:30, në ambientet e një restoranti, ku një konflikt i çastit mes dy punonjësve ka përfunduar tragjikisht.
Sipas informacioneve paraprake, picieri Filip Shehu, 41 vjeç, ka goditur me thikë kuzhinierin Indrit Ismaillari, 34 vjeç, gjatë një debati të ashpër në vendin e punës. Pavarësisht ndihmës së menjëhershme dhe transportimit të tij në spital, Ismaillari nuk mundi t’u mbijetonte plagëve të marra, duke ndërruar jetë pak minuta më vonë.
Burime nga hetimi bëjnë me dije se mes dy kolegëve kishte pasur konflikte të vazhdueshme. Gjatë dëshmisë së dhënë përpara grupit hetimor, autori i dyshuar ka deklaruar se viktima e kishte bullizuar për një kohë të gjatë, çka sipas tij e kishte çuar drejt aktit ekstrem.
Njoftimi i policisë:
Tiranë/Informacion paraprak
Rreth orës 15:30, në zonën e Komunës së Parisit, në ambientet e një lokali, shtetasi F. Sh., rreth 41 vjeç, dyshohet se gjatë një konflikti për motive të dobëta, ka goditur me mjet prerës shtetasin I. I., rreth 34 vjeç, të dy punonjës të lokalit.
Shtetasi I. I. ka humbur jetën në spital, si pasojë e plagëve.
Falë reagimit të menjëhershëm të shërbimeve të Policisë, autori i dyshuar, shtetasi F. Sh., është kapur dhe shoqëruar në Komisariat, menjëherë pas ngjarjes.
Grupi hetimor vijon punën për përcaktimin e rrethanave dhe dokumentimin e plotë të rastit.
