Prokuroria e Fierit ka kërkuar këtë të enjte masën e sigurisë “Arrest me burg”, për dy autorët (Florian dhe Klajdi Muka) e vrasjes së Grei Bihucit mesditën e 11 marsit në Fier. Ata akuzohen për “Vrasje me paramendim” e kryer në bashkëpunim dhe “Prodhimi, blerja apo shitja e armëve të ftohta”.
NJOFTIMI I POLICISË:
Prokuroria e Fierit kërkon ‘Arrest në burg’ për shtetasit F.M dhe K.M për ‘Vrasje me paramendim’ e kryer në bashkëpunim dhe ‘Prodhimi, blerja apo shitja e armëve të ftohta’. Prokuroria pranë Gjykatës së Shkallës së Parë të Juridiksionit të Përgjithshëm Fier, në bashkëpunim me policinë gjyqësore, bënë të mundur dokumentimin e plotë ligjor të ngjarjes së ndodhur më datë 11.03.2024, në qendër të qytetit të Fierit, përballë Bar restorant “Piazza”, ku rreth orës 11.30, shtetasit F.M dhe K.M në bashkëpunim me njëri-tjetrin, kanë goditur me një mjet të mprehtë (thikë) shtetasin G.B, ku si pasojë e plagëve humbi jetën. Në lidhje me këtë ngjarje, Prokuroria pranë Gjykatës së Shkallës së Parë të Juridiksionit të Përgjithshëm Fier regjistroi në datën 11.03.2024 çështjen penale nr. 382, për veprat penale “Vrasje me paramendim”, e kryer në bashkëpunim dhe “Prodhimi mbajtja blerja apo shitja pa leje e armëve te ftohta”, parashikuar nga nenet 78/1- 25 dhe 279/2 të K.Penal, në ngarkim të shtetasve F.M dhe K.M. Po ashtu, Prokuroria pranë Gjykatës së Shkallës së Parë Juridiksionit të Përgjithshëm Fier ka kërkuar në gjykatë caktimin e masave të sigurimit me karakter shtrëngues “Arrest në burg”, parashikuar nga neni 238 i Kodit Procedurës Penale, ndaj shtetasve F.M dhe K.M. Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë për një hetim të plotë dhe gjithanshëm të kësaj ngjarjeje, me qëllim hetimin e thelluar të motivit, shkaqeve apo përfshirjen e personave të tjerë në këtë ngjarje të rëndë.
Bihuci u godit me thikë mesditën e të hënës nga 18-vjeçari Florjan Muka, i cili u arrestua nga policia. Ndërsa dy ditë më parë u arrestua edhe kushëriri i tij, Klajdi Muka, 17 vjeç. Sherri ka nisur mes dy kushërinjve dhe 20-vjeçarit Olsi Serjanin, i cili ka mbetur i plagosur. Grei Bihuci është vrarë aksidentalisht, pasi është futur për të ndarë shokët. Serjani ndodhet në spital, ndërsa në familjen e Bihucit janë hapur dyert e mortit. Paraprakisht dyshohet se sherri mes tyre mund të ketë nisur në rrjetet sociale për shkak të opsionit “like” ndaj një vajze.
