Vrasësi i Charlie Kirk vazhdon te jetë i lirë, pasi edhe dy persona të ndaluar si të dyshuar janë liruar nga autoritetet, duke shtuar konfuzionin dhe presionin ndaj hetimeve për gjetjen e autorit të vërtetë.
Lajmi tronditës u konfirmua nga vetë drejtori i FBI-së, Kash Patel, i cili në mbrëmje njoftoi gjithashtu se “hetimet po vazhdojnë dhe do të ndajmë informacion në mënyrë transparente me publikun”.
Ky zhvillim i papritur ndodhi vetëm pak orë pasi Patel kishte deklaruar në një postim në rrjetin X (ish-Twitter) se autori i atentatit ishte arrestuar. Madje, më pas, u mbajt një konferencë për media nga guvernatori i Utah-it, Spencer Cox, dhe policia, ku thanë se kamerat e sigurisë i kishin çuar tek një person i dyshuar.
Tashmë, pas dy ndalimeve të pasuksesshme, autoritetet janë ende në kërkim të vrasësit të konservatorit të njohur amerikan. CharlieKirk u nda nga jeta duke lënë pas gruan e tij, Erika Kirk, dhe dy fëmijët e tyre, një vajzë trevjeçare dhe një djalë një vjeçar!
Një zë i njohur në politikën konservatore amerikane, Kirk ishte themelues i organizatës Turning Point USA dhe njihej për fjalimet e tij provokuese në kampuse universitare dhe për angazhimin aktiv në debatin publik. Vdekja e tij tronditi opinionin, ndërsa autoritetet vijojnë hetimet për të çuar autorin para drejtësisë.
