Gati një vit më parë 4 vjeçari nga Kumanova, Almir Aliu u vra pasi u godit me makinë nga Boban Iliq. Vogëlushi ndodhej së bashku me familjarët e tij në ambulancën e qytetit të Kumanovës dhe pak minuta para se të ndodhte ngjarja tragjike ata kishin pasur një zënkë me të akuzuarin Boban Iliq.
Në shenja hakmarrje Boban është kthyer dhe ka pasur për qëllim të lëndonte të gjithë familjen Aliu, por për fat të keq në këtë moment u lëndua rëndë Almiri 4-vjeçar, i cili për ditë të tëra luftoi me jetën dhe fatkeqësisht nuk mundi të mbijetonte.
Tashmë kur ka kaluar gati 1 vit nga kjo ngjarje makabre dhe faktet janë mëse të qarta, zënka dhe kamerat e sigurisë vërtetojnë gjithçka, i akuzuari Boban Iliq është liruar nga burgu. Gjykata e Kumanovës e cilësoi aktin e kryer nga ai, jo një vrasje, por një rrezik për jetën në trafik.
Pas lirimit Boban është pritur si një hero nga familjarët ku nga fotot shihet duke festuar me flamurin e Serbisë.
Gjithashtu ai ka kërcënuar hapur gazetarin e TV 21, Furkan Saliu dhe iu ka treguar gishtin e mesit edhe familjarëve të Almir Aliut.
