Bllokimi dhe vonesat e krijuara nga portali e-Albania kanë shkaktuar penalitete, kosto shtesë, kaos dhe vështirësi të panumërta. “iconstyle.al” ka denoncuar që prej fillimit problematikat e këtij portali qeveritar, që lidhen me mos-funksionim, rritje kostoje, cënim sigurie i të dhënave private, konfuzion dhe mungesë besimi nga qytetarët.
Më herët, ishte Konfindustria Italiane ajo që i tërhoqi veshin mangësive e problematikave të shumta të e-Albania.
“Penalitetet për regjistrimet e detyrueshme të vonuara janë rritur, ndërkohë që aplikimet online hasin vështirësi të shumta. Portali bllokohet shpesh me orë të zgjatura, ndërsa subjektet penalizohen edhe kur e-Albania nuk funksionon për shkaqe të vetë portalit.”
Këto dhe shumë problematika të tjera u ngritën në shkresën e Konfindustrisë Italiane.
Gjithashtu, Dhoma Amerikane i ka paraqitur Doganave ankesat e saj lidhur me portalin e-Albania.
225 kompani të anëtarësuara në Dhomën Amerikane gjatë një takimi me drejtorin e Doganave, Gent Gazheli u ankuan për mosfunksionimin e shërbimeve online. Sipas kryetares së Komitetit të Taksave të Dhomës Amerikane aksesi në E-Albania për bizneset nuk po funksionon.
“Ne po vuajmë të gjithë nga sistemi online aktualisht sepse edhe në administratat e tjera është vendosur sistem nga 1 Maji dhe ka problem që po i ndjejnë dhe nuk janë zgjidhur ende.”, u shpreh Alketa Uruci.
Gent Gazheli, Drejtori i Përgjithshëm i Doganave, u zu ngushtë përballë ankesave dhe u shpreh se janë duke punuar me AKSHIN për të rregulluar sistemin.
Mirëpo, askush nuk ka besim në manovrat e qeverisë. Të dhënat tona do t’i shiten kompanive private e do të përdoren gjithashtu gjatë zgjedhjeve, njësoj siç e pësuam në skandalin e patronazhistëve, publikimin e pagave dhe targave.
