“Kryeqyteti i Shqipërisë është transformuar në një destinacion të gjallë dhe të përballueshëm”! Ky është titulli që i ka përshtatur prestigjiozja “Vogue” artikullit për Tiranën.
Ndërsa e nis nga mbrëmjet e të rinjve me muzikë dhe stilin e lokaleve, revista përshkruan jetën e përditshme, me fokus në vendet që e bëjnë kryeqytetin shqiptar të veçantë. “Vogue” e krahason zonën e ish-Bllokut me Sarajevën.
Në shkrim, Tirana ish-komuniste tashmë është bërë metropol plot jetë dhe mbi të gjitha i përballueshëm për një stil komod jete.
“Vogue” shkruan se vitet e fundit Tirana ka bërë kureshtarë shumë turistë, të cilët nuk mendohen 2 herë për të shijuar paqen e Adriatikut apo stilin urban i cili së fundmi ka patur ndryshime rrënjësore. Lexuesit, i tregohet gjithashtu se ajo që sot është zona më e preferuar nga të rinjtë dhe jo vetëm, dikur ishte ‘molla e ndaluar’ për qytetarët e thjeshtë.
“Gjatë viteve të komunizmit, Blloku ishte i ndaluar për këdo që s’ishte anëtar i partisë elitare”, shkruan prestigjiozja.
“Por tani, Tirana është vend që e do kaq shumë qejfin, njerëzit janë të gëzuar. Ata më në fund po jetojnë lirinë e tyre, po shijojnë krijimtarinë dhe çdo gjë tjetër që për vite me radhë e kishin të ndaluar ta bënin. Edhe pse ende kryeqyteti shqiptar nuk është parajsa turistike, potenciali që njerëzit të duan të kalojnë më shumë kohë atje, por rritet”, vazhdon “Vogue”.
Përveç të tjerave, detaji që dalloi gazetari i shkrimit, Alia Akkam, duket se ka qenë gjallëria dhe mikpritja e njerëzve, duke e quajtur si qytet të ri që të bën optimistë për të ardhmen.
Gjithashtu në të përmendej ushqimi, duke vënë në dukje tendencën që shqiptarët kanë së fundmi për t’u ushqyer shëndetshëm.
