Një vajzë e vogël dymuajshe që kishte nevojë për transplant për të mbijetuar, do të ketë mundësi të operohet në Itali, pasi janë mbledhur të gjitha fondet e nevojshme.
Renata Balliu është gati për t’u nisur drejt shtetit fqinj, për t’iu nënshtruar operacionit pas mbledhjes së parave të nevojshme, për të cilat, një kontribut të madh ka reperi shqiptar Noizy.
Ai njihet për filantropinë e tij ndaj njerëzve në nevojë, dhe të njëjtën gjë ka bërë për Renatën duke dhuruar 14 500 euro për t’i mundësuar shpenzimet e transportit me avion sanitar.
Për vogëlushen janë mbledhur gjithsej 26 mijë euro, që do të shërbejnë për ndërhyrjen. Në trupin e saj të vogël, Renata ka vetëm 15 cm zorrë.
Transplanti kryhet në një klinikë të specializuar të quajtur spitali pediatrik “Bambino Gesu” në Romë dhe kushton 26 mijë euro. Por prindërit nuk i kishin kaq para. Tashmë shpëtimi i jetës së vogëlushes do të jetë në dorë të mjekëve.
