Sekretari amerikan i shtetit, Antony Blinken nis zyrtarisht vizitën e tij të parë në Tiranë. Ai do të kryejë një vizitë tetë orëshe në kryeqytet, ku do të takohet me Presidentin Bajram Begaj, kryeministrin Edi Rama si dhe do të mbajë një konferencë të përbashkët për shtyp me kreun e qeverisë.
Blinken gjithashtu do të zhvillojë një takim edhe me një grup prej rreth 100 të rinjsh, që kanë studiuar në programe të ofruara nga Shtetet e Bashkuara si Fulbright dhe Programi i Vizitorit Drejtues Ndërkombëtar, IVLP.
Gjithashtu rrugët që do të qëndrojnë të bllokuara nga ora 09:30-12.30 dhe 17:30-20.00 janë:
1. Interurbane dytësore Fushë Prezë-Rinas; 2. Interurbane dytësore Rinas-Qafë Kashar dhe anasjelltas; 3. Interurbane kryesore Qafë Kashar – ish-sheshi Shqiponja dhe anasjelltas; 4. Interurbane kryesore ish-sheshi Shqiponja-Teg-Sanatorium dhe anasjelltas; 5. Rruga e Elbasanit, rruga “Dervish Hima”, rruga “Faik Konica”, rruga “Papa Gjon Pali II”, rruga “Ismail Qemali”, rruga “Themistokli Germenji”, rruga “Abdyl Frashëri”, rruga “Ukraina e Lirë”, rruga “Gjergj Filipi”, bulevardi “Dëshmorët e Kombit” dhe bulevardi “Bajram Curri”.
“Vizita vjen pasi ne kemi hyrë në 100 vjetorin e dytë të marrëdhënieve SHBA-Shqipëri dhe në një kohë kur duam të falenderojmë kryeministrin Rama dhe shqiptarët për rolin e tyre si bashkëpenëmbajtës në Këshillin e Sigurimit të OKB-së nga viti 2022 deri në 2023. Shqipëria është tani në Këshillin e të Drejtave të Njeriut”, tha Yuri Kim.
