Kanye West nuk ka lënduar vetëm ndjenjat e Taylor Swift në këtë jetë, por edhe të bashkëshortes së tij Kim Kardashian. Mbretëresha e “Instagramit” tregoi sesi Kanye zhduku me një kërcitje gishtash të gjithë garderobën e saj, madje duke i vënë në dukje se Kim vishej në mënyrë skandaloze. Në një intervistë për BoF Summit në Californi, ylli i “Keeping Up With The Kardashians” rrëfeu: “Gjithmonë kam pasur vetëbesim se vishesha bukur dhe kisha stil. Kjo ndodhi deri në momentin që takova bashkëshortin tim dhe më tha se kisha stil të tmerrshëm.”
Mirëpo Kanye e rregulloi menjëherë gabimin, pasi ndërtoi nga e para të gjithë garderobën e Kim, si dhe e prezantoi me emra të rinj stilistësh.
“Nga 250 palë këpucë, përfundova vetëm me dy palë. Nuk munda dot të përmbaja lotët. Ne u larguam nga shtëpia dhe gjatë kësaj kohe, garderoba ime u mbush me veshje të stilistëve më në zë në botë. Kishte veshje të markave si Lanvin apo Givenchy, që të them të drejtën, nuk i kisha dëgjuar ndonjëherë. Por unë nuk u ofendova nga ky gjest i Kanyes, ai po përpiqej të më mësonte” – tregoi Kim Kardashian.
Mendoni se Kim e ka pasur të thjeshtë të bindë stilistët të prodhonin veshje për të? Gaboheni rëndë!
“Unë udhëtova drejt Parisit për t’u takuar me stilistët por në fillim, askush nuk më merrte seriozisht. Riccardo Tisci (Givenchy) ishte i pari që pranoi të më vishte. Më pas u miqësova me Olivier (Balmain), por asnjë nga veshjet që ai stilonte nuk më bënte. Ndaj ai nisi të stilonte veshje për format e mia trupore.”
