Shemsedin e Isa Abazi, janë dy vëllezërit me origjinë nga Gjilani që ndërruan jetë pas tërmetit të fuqishëm.
Ata u gjetën të pajetë nën rrënojat e një hoteli në Durrës dhe mësohet se kishin ardhur aty për punë.
“Gazeta Express” bën me dije se familja Abazi pak vite më parë ka përjetuar edhe një tragjedi tjetër.
Më poshtë mund të lexoni edhe historinë e vështirë të tyre.
Mbijetesën po e siguronin nga punët që kohë pas kohe po i kryenin si mekanikë në Shqipëri. Me këto punë, dy vëllezërit tashmë të ndjerë Shemsedin e Isa Abazi, njëri 32 e tjetri 29 vjeçar po merreshin një kohë të gjatë.
Por e hëna doli të jetë fatale për këta dy vëllezër. Ata njëjtë sikur mijëra shqiptarë të tjerë u goditën mbrëmë rreth orës 04:00 pas mesnate nga një tërmet me magnitudë prej 6.4 shkallë të rihterit duke mbetur kështu nën gërmadhat e hotelit ku po qëndronin.
Për fatin e tyre nuk u ditë asgjë për më shumë se 15 orë. I pari pa shenja jete u gjet Isai, 29-vjeçar. Më pas, i vdekur u gjet edhe vëllai i tij, Shemsedini 32-vjeçar.
Gazeta Express, sot ka qëndruar në shtëpinë e këtyre dy vëllezërve në fshatin Livoç të Gjilanit. Ata janë të shokuar nga e gjithë kjo ngjarje e rëndë.
Ata tregojnë se Shemsedini e Isai, kishin shkuar për punë në Durrës. Këta të dy kanë lënë pas edhe fëmijë, njëri katër tjetri dy.
Familjet e të ndjerëve jetonin në kushte të rënda sociale.
Por kjo familje para shtatë viteve është përballur me një tragjedi tjetër. Djali i tyre ishte therur me thikë në një pishinë dhe nga plagët kishte ndërruar jetë.
Tani në familjen Abazi ka mbetur vetëm një djalë i cili do të përkujdeset për të gjithë anëtarët e tjerë.
