Në vijim të raportimit të rasteve të shkeljeve në bregdet me muzikën e lartë pas orës 20:00, një tjetër shkelje na vjen këtë herë nga Jala.
Në një denoncim me video tek portali JOQ, nga “Folie Marine”, shihet qartë se nuk respektohet asnjë masë sigurie sa i përket protokollit të Covid-19. Turistët dhe pushuesit shfaqen ngjitur me njëri-tjetrin duke kërcyer nën shoqërinë e muzikës, që sipas aktit normativ të qeverisë duhej të ishte mbyllur pas orës 20:00.
“Pershendetje, shikoni ç’behet nga Folie Marine ne Jalë, dhe te gjithe lokalet e tjera jan mbyllur. Video eshte e bere nga nje mik i imi qe ishte ne club.“, ka shkruar qytetari në videon e dërguar në formë denoncimi.
Qeveria vijon të godasë biznesin e vogël me aksionin e saj duke vendosur gjoba selektive nga njëra anë e duke mbyllur sytë ndaj peshqve të mëdhenj në bregdet.(lexo këtu)
Aksioni i gjobave është shtrirë nga Tirana në Durrës, ndërsa sa i përket jugut, autoritetet duket sikur bizneseve atje u kanë lënë dorë të lirë.
“Iconstyle.al” ka raportuar gjithmonë me pamje rastet kur resorte të mëdha vijojnë të pashqetësuar muzikën pas mesnate nën hundën policisë, si rasti te Mali i Robit i pak ditëve më parë (shiko këtu).
Javën e kaluar ne publikuam pamjet kur një patrullë policie shkonte shumë pranë resortit rreth orës 2:00, i binte njëherë sirenës sa për paralajmërim dhe largohej ndërkohë që muzika vijonte pavarësisht ankesave të banorëve atje dhe orës së vonë.
Ministri Sandër Lleshaj bashkë me profesionistët e PR-it në Policinë e Shtetit, po reklamojnë me zë të lartë çdo ditë rastet e gjobitjes së bizneseve familjare në hall në kushte krizë, ndërkohë kur është fjala për të mëdhenjtë, policia bëhet e verbër ndaj abuzimeve.
/Iconstyle.al
