Për herë të parë në Shqipëri ka nisur funksionimi funksionimi i varrezave murale. Bashkia e Tiranës ka zhvilluar sot ceremoninë e zhvendosjes së 6 trupave italianë që i përkasin periudhës para dhe gjatë Luftës së Dytë Botërore në varrezat murale në Sharrë.
Në këtë ceremoni mori pjesë edhe kreu i Bashkisë së Tiranës dhe ambasadori i Italisë në vendin tonë, Alberto Kutilo.
Kryebashkiaku i Tiranës tha se pas investimeve që kanë përfshirë të dyja varrezat publike, tani ka ardhur koha që qyteti të bëjë një hap tjetër të guximshëm, por që respekton si ata që nuk jetojnë më, ashtu edhe i krijon qytetit mundësi që të mos shpërdorojë hapësirat publike.
“Është shumë e rëndësishme që nisim procedurën për 102 shtetasit italianë të viteve ’30-’40, pra të epokës midis Luftës së Parë dhe Luftës së Dytë Botërore, për të dhënë një shembull se si kjo procedurë bëhet me shumë dinjitet, duke respektuar të gjithë kodet e besimit, kodet civile, duke mësuar nga një shtet modern”- tha Veliaj.
Sipas Veliaj kultura e varrezave murale është e aplikuar prej shumë kohësh nga shumë shtete dhe sjell një trajtim modern qoftë në respektimin e atyre që janë larguar nga jeta, ashtu edhe në menaxhimin e varrezave publike.
“E kuptoj se është një vendim i guximshëm, që ka shumë nevojë për shpjegim, por ama është një vendim i cili na modernizon. Nëse e pranojmë pa histeri, por me besimin se këto janë vetëm eshtrat fizike, kurse shpirti i njeriut është diku tjetër dhe duke parë nga Italia një sistem modern, besoj se kemi trajtuar me dinjitet, por edhe me mend në kokë mënyrën sesi respektohen njerëzit, se si trajtohet kjo hapësirë e limituar publike që kemi në qytet për varrezat”- shtoi më tej Veliaj.
Gjithashtu Veliaj theksoi se do të zhvendosen vetëm eshtrat e atyre që kanë mbi 70-80 vite të varrosura, të braktisura prej kohësh të stërgjyshërve që s’kanë as familje.
