Victoria Beckham ka shumë për të festuar këtë javë. Një ditë pas 43-vjetorit të saj, dizajnuesja e modës mori “Urdhërin e Perandorisë Britanike” (“OBE”) nga Princi William në ceremoninë e zhvilluar në Buckingham Palace.
Ish-këngëtarja e “Spice Girl” u nderua për shërbimin e saj në industrinë e modës dhe punën e saj bamirëse në rreth 17 viteve karrierë. Ajo u shoqërua nga bashkëshorti i saj David, i cili ka marrë një “OBE” në vitin 2003 dhe prindërit e saj.
Duke folur pas prezantimit, Victoria tha se ndihej shumë “e nderuar” dhe “e përulur” që vlerësohej me titullin prestigjioz.
“Ishte një kënaqësi absolute të isha sot në Buckingham Palace. Jam krenare që jam britanike, e nderuar dhe e përulur që mora “OBE”-n tim nga Duka i Kembrixhit. Nëse ëndërroni shumë dhe punoni shumë mund të arrini gjëra të mëdha. Jam shumë e lumtur të ndaj këtë rast shumë të veçantë me prindërit dhe bashkëshortin, pa dashurinë dhe mbështetjen e tyre, kjo nuk do të ishte e mundur”, u shpreh dizajnuesja.
Kjo nuk është hera e parë që ylli i modës është nderuar për kontributin e saj në këtë industri vitet e fundit.
Pas ndarjes nga “Spice Girls”, ajo prezantoi koleksionin e saj në “Javën e Modës” në Nju-Jork në vitin 2008. Falë dizajnëve të saj të njohura, të cilat u veshën nga të famshmet e njohura si, Gwyneth Paltrow, Kate Winslet dhe Eva Longoria, ajo fitoi çmimin “Marka më e mirë” në ceremoninë “British Fashion Awards”, në vitet 2011 dhe 2014.
Burimi: Harper’s Bazaar
