Një zë i ri i është shtuar repit shqiptar prej më shumë se një viti, si pjesë e një prej grupeve më të njohura të muzikës, PINT.
Lluni, emri i vërtetë i të cilit është Leart Zymeru, është reperi më i ri pjesë e grupit të MC Kreshës dhe Lyrical Son.
Ai numëron një sërë hitesh në vetëm kaq pak kohë që është pjesë e tregut shqiptar dhe disa super bashkëpunime të suksesshme me Lyrical Son, Bllekin dhe Mc Kreshën.
Lluni ka bërë debutimin e tij të parë muzikor në vitin 2017-të, një mixtape e cila ishte pjesë e albumit të tij të parë, “BregMatic”.
Reperi i ri në moshë
Learti është nga Kosova dhe njihet si një ndër reperët më të rinj në moshë. Ai ka lindur në Prishtinë dhe është 23 vjeç. Lluni është rritur në një nga lagjet e famshme të Prishtinës, “Bregu i Diellit” dhe që nga fëmijëria ka filluar të dëgjojë muzikë të zhanrit Hip Hop me emra të njohur si: Nas, 2pac, Jay-Z, Biggie etj.
https://www.instagram.com/p/B2TZ6ZnhBc8/
Ndonëse i rrahur me historinë e repit shqiptar, diss-et e famshme që janë bërë ndër vite, Lluni është shprehur në një intervistë kohë më parë, se nuk do të bënte ndonjë diss për ndonjë nga kolegët e tij, por sigurisht që do t’ia kthente dikujt nëse ai do t’i bënte diss i pari.
Është super në freestyle!
Lluni është një tekstshkrues shumë i mirë dhe tekstet e tij njihen për origjinalitetin dhe rrjedhshmërinë, duke e bërë një nga reperët më të mirë në freestyle dhe artikulim.
Ai ka thënë se e merr seriozisht tekstin e një kënge, ndryshe nga shumë reperë të tjerë të cilët mjaftohen me dy-tre fjalë për të bërë një këngë komerciale.
Nëse keni nevojë për prova mjafton të shihni videon e mëposhtme:
Shpesh është cilësuar si pasardhës i MC Kreshës dhe një repist në tjetër dimension.
Më datë 4 dhjetor 2018, Lluni publikoi këngën “Original”, për tekstin e të cilës është kujdesur personalisht.
Në shkurt të 2019-s, Lluni solli bashkëpunimin e tij të parë me Lyrical Son, “JBMTQR”. Teksti i këngës u shkrua nga vetë Lluni dhe Lyrical Son.
Në gusht 2018 Lluni solli bashkëpunimin me Lyrical Son dhe Mc Kreshën. Kënga “Rick Ross”, numëron miliona klikime.
Hiti i fundit i publikuar është ai me Bllekin më 7 tetor 2019. “Tërmet” quhet bashkëpunimi më i ri për tekstin e të cilit është kujdesur vet Lluni.
Për ju që nuk e njihni akoma?
Ajo që dimë ne t’ju themi është se, do të dëgjoni shpesh për të.
Lluni nga ana e tij thotë se nuk e ka menduar asnjëherë famën, apo të përfitojë prej saj! Ai dëshiron të bëjë diferencën me këngët e tij dhe e di që ka marrë përsipër një punë të vështirë duke pasur parasysh numrin e madh të “konkurrentëve”.
Lluni ka vetëm pak kohë që ka nisur të japë koncerte, sepse fillimisht dëshironte të zgjeronte “bagazhin” e tij, pra numrin e këngëve të krijuara prej tij.
https://www.instagram.com/p/B0YRRjFBygj/
/Iconstyle.al
