Gjithmonë ka një arsye për t’i dhënë jetë gardërobës suaj dhe bëni mirë që para se të investoni në diçka, të ndiqni këshillat që vajzat e njohura shqiptare japin për ndjekësit e “iconstyle.al”.
Javën e kaluar Jonida Maliqi tregoi 3 trendet e saj të preferuar dhe ishin super.
Ndërsa në rubrikën e kësaj jave do të sjellim këshillat e një prej blogereve më me stil shqiptare, Angelina Kotorri (Angelinas.lbook në Instagram)
Angelina ka treguar për ne 3 veshjet dhe detajet e saj të preferuar për këtë sezon dhe jemi të sigurt se nëse do i vishni do merrni komplimente pafund.
1- Pulovrat
Dimri dhe pulovrat janë bërë për njëri- tjetrin. Janë veshja më e ngrohtë dhe praktike që mund të kombinohen shpejt dhe thjeshtë. Angelina sugjeron pulovrat që punon gjyshja me shtiza, në formë jeleku. Duket si kthim në kohë, por me to mund të dukesh bukur dhe nuk kanë shumë kosto.
2- Fustan me shkëlqim
Meqë jemi në prag festash dhe në dhjetor shkëlqen çdo gjë, ai nuk duhet të mungojë as në fustane. Nëse jeni duke vrarë mendjen se çfarë do të vishni këtë fundvit, Angelina ju sugjeron këtë perlën e kuqe që shihni në foto.
3- Kuadratet bardhë e zi
Kuadratet janë kthyer sërish në modë dhe ata bardhë e zi janë më praktikët. Blogerja shqiptare i sugjeron në çdo veshje apo detaj. Duke nisur nga fustanet, beretat apo edhe pantallonat. Mos ngurroni t’i bëni pjesë të gardërobës suaj!
