Së fundmi qarkulloi me shpejtësi një vendim i marrë nga Ministria e Arsimit në lidhje me frekuentimin e leksioneve dhe seminareve. U duk se viti i ri akademik do të niste me ndryshime të mëdha pasi me vendim të ministres së Arsimit dhe Sportit, Evis Kushi frekuentimi i leksioneve do të ishte i detyrueshëm dhe në varësi të programit të studimit përqindja do të ndryshonte.
Përveç seminareve, studentët do të merrnin mungesa edhe në leksione, që deri më sot kanë qenë fakultative. Nëse studentët nuk përmbushnin përqindjet e caktuara të seminareve dhe leksioneve ata nuk do të kishin mundësi të futen në provime.
Nëse studenti ka disa lëndë ku nuk ka arritur kuotën e prezencës ai do të detyrohet të përsërisë vitin akademik duke paguar sërish tarifën.
Sigurisht kjo nuk u prit aspak mirë nga studentët, të cilët nuk lanë pa e thënë fjalën e tyre. Në rrjetet sociale por edhe në mënyra të tjera, studentët kundërshtuan vendimin e Ministrisë së Arsimit dhe Sportit, dhe me sa duket ia kanë arritur qëllimit. Ministrja Kushi është tërhequr nga vendimi i saj, dhe në vendimin e ri që po shpërndahet shihet se leksionet nuk janë më me detyrim dhe nuk ka një përqindje që duhet plotësuar.
