Kanë më shumë se 80 ditë brenda shtëpisë së ‘Big Brother VIP Albania’ por banorëve u duket sikur kanë 1 vit. Kështu u shprehën mbrëmjen e djeshme, teksa po shihnin veten e tyre, në ditën e parë të hyrjes në shtëpi.
Kjo u mundësua nga Vëllai i Madh, i cili lejoi banorët që të shohin në living të gjithë natën e parë të spektaklit, duke përfshirë hyrjen e tyre, klipin prezantues të secilit e madje të dëgjonin edhe mendimin e opinionistëve.
Të ulur të gjithë në kolltuk, banorët shikuan me shumë vëmendje hyrjen e tyre në shtëpi e mënyrën sesi janë qasur me njëri-tjetrin. Sigurisht që komentet nuk munguan por as lotët. Kiara Tito u përlot teksa pa në klip gjyshen e saj, e cila përcolli më 24 dhjetor mesazhin për të.
Olta ishte e para e cila pa prezantimin e saj në shtëpi ndërsa Luizi i fundit. Të qeshurat nuk munguan, sidomos tek hyrja e Kejvinës, e cila harroi tekstin që i tha Arbana apo tek përballja e Ronaldos me rulotin.
