Vëllai i Liridona Ademajt, Leonardi ka paralajmëruar se tani do të nisë fushata e familjes së tij për të kërkuar llogari për vrasjen e motrës.
Me anë të një postimi në “Facebook”, Leonardi ka falënderuar në emër të tij dhe nënës së tij, ndërsa shkruan se tani do të fillojë fushata e tyre për drejtësi.
Reagimi i plotë:
Nuk kemi fjalë të shprehim mirënjohjen tonë për të gjitha organizimet për të nderuar Liridonen dhe për të kërkuar drejtësi për të gjitha gratë dhe vajzat e vrara.
Ditët po na bëhen edhe më të vështira dhe mezi po kalojnë e dhimbja po rritet por organizimet në shumë qytete në Kosovë dhe në Shqipëri po na japin forcë që të mos dorëzohemi.
Sonte bashkë me nanen po i përcjellim lajmet dhe marshin në Prishtinë dhe ndonëse shumë e pikëlluar, nana vazhdimisht po thotë faleminderit prej tyre që po e bëjnë këtë për Donen time.
Fushata jonë për drejtësi fillon tani, bashkë me ju aktiviste, organizata joqeveritare dhe me mbështetjen e mediave. Ne duam drejtësi të shpejtë dhe profesionale, pa vonesa dhe pa gabime. Kriminelët duhet të kalben në burg. Asnjë grua tjetër nuk duhet të vritet. Ne besojmë në institucionet e shtetit dhe presim që të ndajnë drejtësi.
Ditën e djeshme, trupi i 30-vjeçares është rivarrosur në vendlindjen e saj.
