Me foshnjën vetëm 2 ditëshe në krah familjarët e 25-vjeçares Rexhina Debrova, e cila ndërroi jetë një orë pas lindjes, protestojnë sot para Gjykatës së Elbasanit.
Protesta vjen pasi dy mjekët, që u arrestuan për vdekjen e të resë në Maternitetin e Elbasanit, dolën sot para gjykatës për t’u njohur me masën e sigurisë.
Kardiologu Mehmet Ibaj dhe reanimatori Niko Thano u arrestuan me akuzën e mjekimit të paligjshëm.
“Duam drejtësi, të zbardhet e vërteta. Nuk duam të manipulohet e vërteta”, u shprehën familjarët e Rexhina Debrovës.
Ndërkohë që bashkëshorti i së ndjerës tha: “Të mendojnë vetëm një gjë kur të mbushi kjo goca ime 1 vjeçe, a do t’ia festoj unë ditëlindjen? A do t’ia festojmë dot një ditëlindje? Nuk do t’ia festojmë dot se na kujtohet ngjarja tjetër”.
Dyshohet se një prej mjekëve është vonuar rreth 3 orë për të mbërritur në vendin e punës. Ndërkohë sipas autopsisë, shkaku i vdekjes së 25-vjeçares ishte mpiksja e gjakut, të resë iu bllokua një nga venat që çon gjakun në mushkri.
