Mëngjesin e ditës së djeshme u gjet i vdekur aktori 23-vjeçar Art Kurti. I lindur në Gjakovë më 28 dhjetor 1995, Arti u bë i njohur për të gjithë me rolin e studentit nga Gjakova në serialin “O sa mirë”.
Ai u gjend i vdekur mëngjesin e 24 prillit në makinën e tij në fshatin Goden të Gjakovës, në rrethana shumë të dyshimta.
Sot do të mbahet edhe ceremonia mortore e përcjelljes për në banesën e fundit të aktorit të njohur.
“Të nderuar familjarë, miq dhe kolegë ju njoftojmë që nesër e mërkurë, datë 25.04.2018 me rastin e ndarjes nga jeta të kolegut tonë Art Kurti, Komuna e Gjakovës do të mbajë mbledhje komemorative në Pallatin e Kulturës ‘Asim Vokshi’ në Gjakovë me fillim nga ora 15:30.
Pas mbledhjes komemorative, trupi i pajetë do të qëndrojë në hollin e Pallatit të Kulturës ‘Asim Vokshi’ për homazhe deri në orën 17:30. Ndërkaq varrimi i të ndjerit, do të bëhet në orën 18:00 në tyrben e ‘Sheh Fetahu-t’ (në magjistralen Gjakovë-Prizren)”, shkruhet në njoftimin e Komunës së Gjakovës.
Policia e Gjakovës bëri të ditur ditën e djeshme se deri më tani dyshohet se Art Kurti ka kryer vetëvrasje, megjithatë po vijojnë hetimet.
