Një tragjedi që tronditi vendin mori vëmendjen e opinionit publik pas ndarjes së parakohshme nga jeta të 25‑vjeçares Xhuana Nikollaj, e cila u gjet pa shenja jete në një banesë në kryeqytet, pasi konsumoi fostoksinë, një substancë toksike, mëngjesin e 10 marsit 2026. Ngjarja, e cila ka ngritur shumë pikëpyetje për rrethanat që e çuan drejt këtij akti ekstrem, është shoqëruar me hetime të thelluara nga organet e rendit dhe reagime të familjarëve.
Familja e Xhuana Nikollajt, me zemër të copëtuar nga humbja e vajzës së tyre të bukur dhe plot jetë, ka folur për herë të parë për ngjarjen te emisioni “Me Zemër të Hapur”, duke theksuar se nuk kishin qenë në dijeni të vuajtjeve të saj dhe problemeve që mund të kishte përjetuar gjatë marrëdhënies me ish‑bashkëshortin Eraldo Fizi. Sipas babait të të ndjerës, divorci u krye pa ngatërresa të mëdha dhe vajza ishte përpjekur të rindërtonte jetën e saj në Tiranë mes motrave dhe shoqeve të saj. Ai ka bërë apel që drejtësia të zbardhë plotësisht rrethanat e kësaj tragjedie që i ka marrë jetën të resë së familjes.
“Jemi të vdekur, vetëm marrim frymë. U zhvendos 3 muaj më parë në Tiranë. Lajmin na e dha vajza tjetër, se është në Tiranë. Nuk na ka thënë asgjë për dhunën, s’dinim asgjë. Me Eraldon u martua në qershor të vitit të kaluar. U divorcuan në janar. U ndanë pa ngatërresa, se nuk shkonin. Nuk jam në gjendje me fol, na falni. A do të ngjallet ajo?! Ia kemi lënë në dorë drejtësisë.”, tha ai.
