Prokuroria italiane po kryen hetime për vdekjen e 7-vjeçares shqiptare Anisa Murati, e cila humbi jetën pasi u mbyt në liqenin Caraglio pranë Cuneos ku ndodhej në një kamp veror. Mediat e huaja raportojnë se nën hetim nga prokurorja është Famullitari i Demontes, Don Fabrizio Della Bella dhe një prej animatorëve.
Vajza 7 vjeçare ndiqte kampin veror të famullisë së Demontes. Hipoteza për personat në hetim është ‘vrasje nga pakujdesia’, ku përfshihen edhe drejtuesi i strukturës së shkollës verore.
Hetimi vjen pas thirrjeve të familjarëve të së ndjerës që kërkonin drejtësi. Konkretisht babai i të miturës ka deklaruar se vajza nuk dinte të notonte, për këtë ishin vënë në dijeni edhe mësuesit, prandaj i kishin dhënë me vete edhe krahë ndihmës. Struktura verore Bioparki është nën sekuestrim dhe nesër më datë 1 gusht do të ketë hetime të mëtejshme me teknikët e Spresal dhe zjarrfikësit. Qendra verore kishte gjithsej në përbërje 15 fëmijë dhe dy animatorë të rritur.
Murati humbi jetën teksa kishte shkuar me shokët dhe shoqet në liqenin e bioparkut AcquaViva në Caraglio. Raportohet se e mitura u gjet dy metra thellë në pellgun e madh artificial. Për nxjerrjen e trupit është dashur ndërhyrja e ekipeve të emergjencës.
