Zëvendësministrja e Shëndetësisë Mira Rakacolli konfirmoi sot se në vendin tonë nuk ka asnjë rast të infektuar me Koronavirus.
Në një njoftim për shtypin ajo njoftoi se deri më tani janë testuar 13 raste të dyshuara, por të gjitha kanë rezultuar negative.
“Nuk ka asnjë rast të konfirmuar për Koronavirusin. Janë testuar 13 raste me histori udhëtimi përfshirë edhe Italinë, por kanë rezultuar negative. Është miratuar fondi shtesë 1 milion dollarë vetëm për shtimin e stokut të materialeve mbrojtëse. Nëse keni temperaturë, kollë, rrufë dhe histori udhëtimi nga vendet e prekura, telefononi në numrin 127”, tha ajo.
Zëvendësministrja sqaroi edhe rastin e një qytetari nga Skrapari që humbi jetën në Sanatorium dhe u dyshua nga gripi i derrit.
“Pacienti ka humbur jetën si rezultat nga një pneumoni që është konstatuar se ka qenë i prekur edhe nga gripi stinor. Nuk ka pasur asnjë lidhje me Koronavirusin”, tha Rakacolli.
46-vjeçari nga fshati Therepel i Skraparit vuante edhe nga diabeti, zemra dhe tensioni.
/Report tv
