Vatikani mblodhi yjet e trojeve shqiptare brenda natës së 3 shtatorit në Bazilikën Papale të Shën Palit. Koncerti madhështor u mbajt në vigjilje të shenjtërimit të Nënës Terezë, njëkohësisht për 19-vjetorin e shuarjes së saj.
Aktiviteti nisi me fjalimin e imzot Dodë Gjergji, Ipeshkëv i Kosovës, i cili dha një historik poetik për jetën dhe veprimtarinë e Nënë Terezës. Ai foli për figurën e Nënë Terezës duke vlerësuar lart personalitetin, humanizmin dhe devotshmërinë e saj.
Këngëtarja me famë botërore, Rita Ora dhe ish-kapiteni i Kombëtares Shqiptare, Lorik Cana u zgjodhën për të përshëndetur të pranishmit, si dhe për të bërë hapjen e mbrëmjes së rëndësishme. Rita Ora fillimisht iu drejtua të pranishmeve në gjuhën shqipe duke i përshëndetur dhe uruar mirëseardhje. “Zonja e zotërinj, motra e vëllezër, mirëmbrëma”, tha Ora.
Pjesën tjetër, një dedikim Nënë Terezës, Rita e bëri në anglisht, ndërsa përkthimin në shqip dhe italisht e bëri ish-kapiteni Lorik Cana.
“Ne bijtë e gjakut dhe bijtë shpirtërorë të saj, jemi këtu për ta nderuar dhe falënderuar për jetën dhe veprën e saj madhore, në dobi të më të varfërve në botë. Ajo, një grua shtatvogël, që e ka bashkuar mbarë njerëzimin në një përqafim të madh, pa asnjë dallim, vetëm me fuqinë e besimit dhe frymëzimin e dashurisë. Këtë e dëshmon edhe ky koncert dhe prania juaj. Koncerti ynë është një itinerar, një shpjegim, një falënderim dashurie me muzikë, që mund të përmblidhet me thënien e Nënës Terezë: “Vetëm dashuria do ta shpëtoj botën”, u shprehën së bashku Rita Ora dhe Lorik Cana.
Më pas mirëseardhja muzikore u bë nga diva e muzikës shqiptare, Inva Mula, e cila këndoi “Ave Maria” me zërin e magjishëm.
Sopranoja Mula u pasua nga baritoni, Gëzim Myshketa, i cili interpretoi “Libera Me” nën dirigjimin e Bujar Llapës dhe nën shoqërimin e korit dhe të orkestrës së Filarmonisë së Kosovës.
Programi vazhdoi me recitimin e vargjeve të Nënës Terezë nga djaloshi i talentuar Andi Bajgora, i cili sivjet përfaqësoi vendin edhe në ceremoninë “Oscars” si protagonist i filmit me metrazh të shkurtër “Shok”. Bajgora bëri një ndërthurje mes muzikës dhe narracionit të vargjeve të murgeshës së të varfërve me interpretimin e “Take Time”.
Ai ia la vendin violinistit nga Gjakova me famë botërore, Shkëlzen Doli, i cili solli në fillim tingujt e “Meditation të Massenet”
Skenën madhështore të Bazilikës së Shën Palit e mbizotëroi me zërin e saj, sopranoja Elbenita Kajtazi, e cila më pas i la radhën tenorit me prejardhje nga Istogu, Ramë Lahaj.
Ndërsa Lum Veseli recitoi në shqip vargje të Nënë Terezës për t’i lënë radhën sopranos shqiptare, Ermonela Jaho, e cila shpërtheu me zërin e saj lirik. Ajo tregoi dy herë potencën e saj dhe talentin me interpretimin brilant, duke dhuruar emocione të papërshkrueshme.
Në skenë u ngjit mbrëmjen e së shtunës edhe pianisti e kompozitori shqiptar, Genc Tukiçi, me një instrumentale në piano i shoqëruar nga instrumentistët e tjerë të pranishëm në sallë.
Këngëtarja shqiptare me famë botërore Rita Ora performoi një nga himnet më të bukura të Krishtlindjes, këngën “What child is this”, të shkruar nga William Chatterton Dix, në 1865 dhe të sjellë enkas për këtë koncert nën orkestrimin e mjeshtrit Shpëtim Saraçi. Këtë këngë Rita Ora e kishte interpretuar në një duet me tenorin e madh italian, Andrea Bocelli, në dhjetor të vitit 2015, por këtë herë ajo ishte e vetme në skenë. Këngëtarja nga Kosova kishte ndryshuar në pamjen e një katolikeje, ndryshe nga sa jemi mësuar ta shohim, ajo i ishte përshtatur shumë mirë këtij eventi duke treguar edhe respektin e duhur.
Në Vatikan jehoi edhe kënga shqipe! Baritoni Gëzim Myshketa këndoi këngën epike “Hej ju male” të Çesk Zadesë, duke sjellë këtë perlë për publikun nga mbarë bota. Ai u pasua nga tenori Ramë Lahaj, i cili interpretoi këngën “Agimet Shqiptare” nga Avni Mula. Ndërsa violinisti Shkëlzen Doli interpretoi veprën madhështore “Arbëresha ime” nga Gerti Druga.
Sopranoja Elbenita Kajtazi interpretoi këngën për Nënë Terezën, e shoqëruar në lahutë nga Sherif Kurti dhe nën dirigjimin e Baki Jasharit.
Kapiteni i Kombëtares shqiptare, futbollisti Lorik Cana, recitoi poezinë “Dua të kthehem në Shqipëri” të shkruar nga Nënë Tereza tri javë para se ajo të ndërronte jetë.
Producentja Dijana Toska ia doli të bënte bashkë më shumë shqiptarë se asnjëherë, në selinë e shenjtë për një shenjtore. Eventi nuk ishte një lamtumirë, por si një shprehje më e fortë për të treguar përkatësinë e saj.
Interpretimi i Himnit për Nënë Terezën, që ishte paralajmëruar qysh në muajin prill, ishte pika kryesore e koncertit. Himni i quajtur “Valsi Hyjnor” u interpretua nga sopranoja Inva Mula së bashku me orkestrën dhe korin e Filarmonisë së Kosovës, drejtuar nga mjeshtri Bujar Llapaj.
Veç emrave të njohura të artit shqiptarë, pjesë e koncertit u bënë edhe personalitete të politikës shqiptare, si Presidenti Bujar Nishani, kryeministri Edi Rama, kryetari i Kuvendit, Ilir Meta, kreu i Partisë Demokratike, Lulzim Basha dhe ish-kryeministri Sali Berisha, ndërsa nga Kosova merrnin pjesë Presidenti Hashim Thaçi, kryeministri Isa Mustafa, kryeparlamentari Kadri Veseli etj.
Burimi: Telepace
