Thellë në një kodër në Provincën Shanxi të Kinës ndodhet një prej varreve më misterioze në historinë e njerëzimit – ai i Qin Shi Huang, perandorit të parë të Kinës së bashkuar. Prej më shumë se 2 mijë vjetësh, ky vend i shenjtë ka qëndruar i paprekur, fshehur mirë nën tokë dhe i ruajtur nga një ushtri spektakolare prej balte, që sot njihet si “Ushtria e Terrakotës”.
E zbuluar rastësisht nga disa fermerë në vitin 1974, kjo ushtri përbëhet nga mijëra ushtarë me madhësi reale, secili me tipare unike, të pajisur me armë, qerre e kuaj, të rreshtuar për betejë për të mbrojtur zotërinë e tyre edhe në botën tjetër.
Por, pavarësisht dekadave të studimeve arkeologjike dhe përpjekjeve për të kuptuar më shumë mbi civilizimin e Qin-it, vetë varri i perandorit mbetet i paeksploruar. Arsyeja? Frika.
Sipas shkrimeve të lashta, brenda varrit ndodhen kurthe të sofistikuara: harqe që aktivizohen automatikisht për të qëlluar pushtuesit dhe lumenj me merkur të lëngshëm që mund të rrjedhin në çdo çarje. Shkencëtarët nuk janë të gatshëm të rrezikojnë jetën për të zbuluar atë që ndodhet brenda, ndërkohë që edhe niveli i lartë i merkurit në tokën përreth është vërtetuar nga matje të kohëve të fundit.
Derisa teknologjia të avancojë mjaftueshëm për të eksploruar pa kontakt të drejtpërdrejtë, varri i Qin Shi Huangut do të mbetet një mister i mbuluar me legjenda, frikë dhe shumë dyshime. Për arkeologët, kjo është një nga ato raste ku historia pret në heshtje — dhe me helm.
