Në kohën kur pandemia e koronavirusit po bën namin në Europë dhe Amerikë me valën e dytë të saj, disa shtete të cilat janë shpesh jashtë vëmendjes së mediave, vijojnë me programet e tyre të vaksinimit.
Megjithëse zyrtarisht vaksina nuk ka dalë ende në përdorim për botën, duket se Kina nga ku nisi dhe u përhap virusi COVID-19, ka kohë që po vaksinon popullatën me një antidot të saj, prej nga ku shikohen dhe rezultatet.
Por sipas BBC-së, testimet e vaksinës kineze të profilit të lartë, po kryheshin edhe në Brazil, prej nga ku më pas janë pezulluar.
Siç raporton BBC, vaksina kundër koronavirusit të ri u pezullua për shkak të një incidenti të rëndë. Megjithatë autoritetet braziliane nuk kanë dhënë ende detaje për këtë problem, duke e veshur pak ngjarjen edhe me mister.
Vaksina “Sinovac” ishte në fazën finale të testimit global dhe po testohej në individë në Brazil, të cilët jo vetëm po e merrnin falas atë, por edhe po paguheshin për eksperimentimin.
Por Kina ka nisur që ta përdorë që tani këtë vaksinë për të imunizuar mijëra njerëz në vend, në një program emergjence.
Por duket se pas vendimit që erdhi nga Brazili për ta pezulluar, ende nuk ka një reagim nga kompania kineze.
Brazili është një nga vendet më të prekura nga koronavirusi. Aty po zhvillohen disa testime vaksinash nga kompani të njohura ndërkombëtare.
/Burimi: BBC/ Përshtati: Iconstyle.al/
