Ndërsa shumica e artistëve iu drejtuan qendrave të votimit në të gjithë vendin, Besa Kokëdhima, nga profili i saj në “Instagram” bëri krejt të kundërtën. Lëvizja politike “Zgjidhja”, themelues i së cilës është i ati i këngëtares, Koço Kokëdhima, prej pak kohësh ka bërë thirrje për bojkotim të zgjedhjeve parlamentare.
Edhe Besa, duke e lënë mënjanë për pak profilin artistik, ka postuar një foto me logon e lëvizjes “Zgjidhja”, e cila bën thirrje për të bojkotuar procesin zgjedhur gjatë ditës së sotme: “Më vjen keq! Doja dhe shpresoja që ta ndryshonit këtë vend! Por ju nuk e bëtë dhe nuk do ta bëni! Bojkoti po fiton! Sepse jemi të gjithë të lodhur nga **** juaj i pambarimtë” – shkruan Besa në profilin e saj në “Instagram”.
Por ajo që tërhoqi më shumë vëmendjen ishte veprimi i vajzës më të vogël të politikanit Kokëdhima, Era. Ajo publikoi në “InstaStory” një foto të fletës së votimit me një germë Z të shkruar mbi të, që lidhet me forcën politike “Zgjidhja”. Pavarësisht se nuk mund ta kuptojmë nëse ky veprim është bërë nga vetë Era, apo i është dërguar, për diçka jemi të sigurt, ky veprim quhet shkelje penale.
Burimi: Iconstyle.al
