Gazetari dhe moderatori nga Kosova, Arben Ahmeti, i cili është edhe drejtor i televizionit “Kanal 10”, është arrestuar dje nga Policia e Kosovës në orët e mbrëmjes.
Ahmeti është arrestuar ditën e djeshme në orën 18:15 pasi ka ushtruar dhunë, madje edhe në prezencë të fëmijëve, ndaj bashkëshortes së tij, e cila është identifikuar me inicialet V.A.
Klan Kosova raporton se Ahmeti pas konfliktit verbal, në prezencë të fëmijëve, e ka shtyrë gruan e tij pasi ajo ka kërkuar të qëndrojë në shtëpinë e tij në Lapllasel.
Ahmeti supozohet se e ka e shtyrë bashkëshorten, dhe ajo më pas ka kërkuar ndihmën e policisë dhe për shkak të ankthit, stresit dhe gjendjes së viktimës, patrulla ka kërkuar ndihmë mjekësore për të.
“Më datë 25.09.2022, në ora 18:15, është pranuar kallëzim për dhunë në fshatin Laplla Sellë, rruga Dragovacka. Në vendngjarje ka dalë patrulla si dhe polici hetues në detyrë për dhunë në familje ku sipas V. A. ka pasur konflikt me bashkëshortin. Pra sot më 25.09. 22 rreth orës 18:00 i dyshuari Arben Ahmeti, i cili në atë kohë i kishte sjellur dy fëmijët (5 dhe 6 vjeç) të cilët qëndronin tek ai nga data 23.09.22 për shkak se çifti nuk jetojnë bashkë. Në atë moment ka pasur një konflikt kur viktima/ gruaja e ka pyetur të dyshuarin të qëndrojë në shtëpi me familjen e tij për shkak se ia kanë kërkuar fëmijët të cilët në atë moment qanin për babanë e tyre, i dyshuari ka kundërshtuar duke e ofenduar verbalisht viktimën deri në momentin kur ka pasur kontakt fizik, përkatësisht duke e shtyer me duar nga ana e të dyshuarit. Për shkak të ankthit, stresit, gjendjen e viktimës, patrulla ka kërkuar ndihmë mjekësore për të”, thuhet në raportin e policisë.
Në këtë raport gjithashtu thuhet se pas grumbullimit të provave dhe intervistimit të viktimës duke qenë se kanë ndodhur edhe më parë situata të ngjashme, me urdhër të prokurores Edina Jupola rasti është cilësuar si “Dhunë në familje” dhe gazetarit Arben Ahmeti i është caktuar masa e ndalimit prej 48 orësh në qendrën e paraburgimit në Prishtinë.
“Me urdhër të hetuesit, patrulla ka marrë deklaratën e viktimës, si dhe ka kontaktuar me të dyshuarin, ku pas provave të grumbulluara në formën e deklaratës së pjesëmarrësit dhe duke qenë se edhe më parë janë raportuar raste të ngjashme, me urdhër të prokurores së shtetit për dhunë në familje, Edina Jupolli, është urdhëruar fillimi i procedurës penale “Dhunë në familje”, ku të dyshuarit i është caktuar masa e ndalimit prej 48 orësh në qendrën e paraburgimit në Prishtinë”, thuhet në raportin e policisë.
