Një burrë, i cili vite më parë u shfaq në kopertinën e albumit “Nevermind” të grupit Nirvana, ka hedhur në gjyq ish-anëtarët e bandës muzikore. Në një padi të ngritur ditën e martë, Spencer Elden, tashmë 30 vjeç, pretendon se grupi ka shkelur ligjet federale të pornografisë së fëmijëve dhe pretendon se prindërit e tij nuk nënshkruan kurrë një deklaratë që lejonte Nirvana-n të përdorte foton e tij.
Në një ankesë të paraqitur në gjykatën federale në Los Angeles, Elden pretendon se “identiteti dhe emri i tij ligjor janë të lidhur përgjithmonë me shfrytëzimin seksual komercial që ai përjetoi si i mitur, i cili është shpërndarë dhe shitur në mbarë botën që nga koha kur ishte foshnjë e deri në ditët e sotme “.
Sipas padisë, të pandehurit “me vetëdije prodhuan, poseduan dhe reklamuan pornografi komerciale të fëmijëve dhe me vetëdije përfituan vlera monetare në këmbim të kësaj.… Pavarësisht nga kjo njohuri, të pandehurit nuk arritën të ndërmarrin hapa të arsyeshëm për të mbrojtur Spencer dhe për të parandaluar përhapjen dhe trafikimin e imazhit të tij”.
Në kopertinën e albumit në fjalë, Elden, i cili asokohe ishte 4-muajsh, shfaqet i zhveshur duke notuar në një pishinë dhe një kartëmonedhë dollari varet para tij në një grep peshkimi. Padia thotë se fotografia, e zgjedhur nga Kurt Cobain, ka përmbajtje seksuale dhe se e bën Elden të ngjajë me një punëtore seksi që përpiqet të kapë një kartëmonedhë.
Pretendohet se Elden nuk u pagua kurrë për paraqitjen në kopertinë dhe se prindërit e tij nuk firmosën kurrë për foton, e cila u shkrep posaçërisht për kopertinën e albumit. Më parë është raportuar se Elden u pagua 250 dollarë.
Elden thotë se ka pësuar “dëme të përjetshme” nga kopertina e albumit të vitit 1991, duke përfshirë “shqetësime ekstreme dhe të përhershme emocionale me manifestime fizike”, plus humbje të arsimimit, rrogave dhe “kënaqësisë së jetës”.
Ai kërkon dëmshpërblim prej 150 mijë dollarë nga secili prej 17 të pandehurve, ku përfshihen ish-anëtarë të Nirvana, drejtues artistik dhe të tjerë.
