Ndërkohë që kanë nisur konkurset për ata që do të fillojnë për herë të parë studimet e larta, mësohet se ministrja Lindita Nikolla tashmë ka caktuar datën e fillimit të viti të ri akademik 2018-2019.
Nga një urdhër i zbardhur nga “Panorama” mësohet se ministrja Nikolla ka firmosur zyrtarisht datat e fillimit të universiteteve si dhe datat e pushimeve për studentët. Sipas këtij urdhri parashikohet që universitetet të startojnë në mesin e muajit tetor.
Periudha e pushimeve do të jetë në më pak se dy javë dhe do të nisin një ditë para Krishtlindjeve dhe do të përfundojnë në 4 janar.
“Viti akademik 2018-2019 në institucionet e arsimit të lartë, do të fillojë në datën 15 tetor 2018 dhe do të përfundojë në datën 30 shtator 2019. Periudha 24 dhjetor 2018 deri në 4 janar 2019, të jetë periudhë pushimesh për studentët”, thuhet në urdhrin e ministrisë.
Mendohet se është zgjedhur mesi i tetorit për fillimin e universiteteve në mënyrë që në fakultete të ketë përfunduar regjistrimi në tre raundet.
“Institucionet publike të arsimit të lartë, në përfundim të regjistrimit të kandidatëve fitues, të dërgojnë në të gjitha ndërmarrjet ‘Trajtimi i studentëve’ sh.a listën e studentëve të regjistruar, sipas programeve të studimit dhe fakulteteve përkatëse”, thuhet në urdhrin e ministrisë.
Kandidatët e këtij viti kanë katër ditë kohë për të aplikuar, ndërsa universitetet do të duhet të përzgjedhin më të mirët deri në datën 29 gusht, kur shpallet lista zyrtare e raundit të parë.
Burimi: Panorama
