“Unë jam e gatshme të marr çdo përgjegjësi”!
Kështu e mbylli fjalën ministrja e Arsimit Lindita Nikolla, e cila doli për herë të parë në Kuvend e prekur dhe gati me lot në sy, pas protestës masive të studentëve, Nikolla u shpreh e gatshme të marrë përsipër gjithçka ndërsa pranoi se studentët kanë të drejtë.
“Po, studentët kanë të drejtë por ftesa për të zhvilluar një betejë më të vështirë është drejt tyre sot duke parë të vërtetën në sy përmes një dialogu për të transformuar cilësitë. Unë e gatshme të marr të gjithë përgjegjësinë”, theksoi ministrja.
Nikolla u shpreh se është krenare që është pjesë e forcës politike, Partisë Socialiste, dhe gjithë reformës që u ndërmorr për arsimin në vitet e fundit.
“Në 5 vite mbyllëm 22 universitete, miliona euro të shkuara dëm nga xhepat e shqiptarëve, por koha do të flasë. Reformuam universitetet, akredituam universitetet, por koha do të flasë. Studentët kanë të drejtë. A janë sot të nevojshme ndryshimet se si përgatiten studentët? Për këtë s’ ka nevojë të flasë koha, por e bërtas edhe unë. Ligji duhet zbatuar dhe kërkon kohë. Sot me studentët gjithkush ka të drejtë të drejtojë gishtin”.
Ministrja deklaroi se janë sajuar shumë të pathëna për të gjatë ditëve të protestës, madje është quajtur edhe “ndrikull” në memet e studentëve. Ajo lexoi disa prej pankartave me të cilat kanë protestuar studentët këto ditë, ndërsa falënderoi të gjithë kolegët që e kanë mbështetur gjatë kësaj kohe.
“Do kishte qenë më e lehtë edhe për ‘Ndikull Nikollën’ hërë me diploma Kristali dhe herë me çanta të shtrenjta. “Lindita Nikolla, dil në Bulevard dhe shkolla është e jona”. Po të dashur studentë, ndaj i mbyllëm shumë kioska. Unë dal në Bulevard me peshën institucionale. Faleminderit kolegë për mbështetjen dhe kurajon, për reformën sistematike. E vërteta dhe puna kanë qenë aleati më i mirë për t’iu vënë dhe turravrapit në një listë gënjeshtarë dhe shpifarakë, por koha do të flasë”.
Fjalimi i ministres u mbajt në një kohë që studentët kanë rrethuar Kuvendin dhe po protestojnë më të bashkuar se kurrë.
